Gula 2
Samtang gidala na sa operating room ang inahan ni Carmela, didto ra ang dalaga nagpaabot sa lobby sa ospital.
Gikulbaan si Carmela nga naghuna-huna nga operahan ang iyang inahan sa kabuthonon na nga apindisaytis, apan sa laing bahin nalipay siya nga may mitabang kanila nga maoperahan ang iyang mama.
Layo kaayo ang iyang panan-aw nga gipunting sa unahan. Takulahaw lang nalantawan ni Carmela ang iyang amahan nga naglakaw, huyhoy ang abaga. Mora’g nasabot ni Carmela nga wala gayud kini makaremedyo og kwarta para sa pagpa-opera sa iyang inahan.
Gisangpit ni Carmela ang iyang amahan dihang nagkaduol na. “Gibiyaan diay nimo si Meling? Paita day, wala g’yud ko makakita og kwarta nga magamit sa pagpa-opera sa imong inahan,†matud ni Papa niya Carlos.
Gitug-anan ni Carmela ang iyang amahan nga tua na sa operating room si Mama niya Meling. “Ha? Nalooy ra diay ang doktor bisan og wala kita’y kwarta? Apan ang mga gikinahanglang tambal, unsaon man karon?†matud sa amahan ni Carmela.
Mitulo ang luha sa amahan sa dalaga. “Paita niining atong kahimtang day, wala pa gani ko’y pamahaw kay igo ra nga giplete ang akong nahabiling kwartra,†matud ni Carlos. Gipikpik ni Camela ang buko-buko sa iyang amahan.
“Tana Pa, mangaon ta sa kan-anan atbang niining ospital,†matud ni Carmela. “Apan utro ka pa nga walay kwarta day,†dali nga tubag ni Carlos ngadto sa iyang anak. “Dia ko’y kwarta Pa, dunay mihatag kanako ug maoy mitabang nga maoperahan si Mama. Gipalit na namo ang mga gikinahanglang tambal,†giingnan ni Carmela ang iyang amahan.
Ingon sa dili makatoo ang amahan ni Carmela sa iyang nadungog. “Kinsa may mitabang nato day?†Nangaon sila sa kan-anan nga nahimutang atbang sa ospital. “Maayo unta kun mobalik kadtong mao nga tawo Pa kay pasalamatan g’yud nako siya sa iyang pagka maloloy-on kanato,†matud ni Carmela.
Gitug-anan usab ni Carmela ang iyang amahan nga gawas sa pagpalit sa maong tawo sa gikinahanglang tambal para sa operasyon sa iyang Mama Meling, gihatagan pa gayud siya’g P3,000.
Nakapanglingo-lingo si Carlos nga nagtan-aw sa kwarta. “Buotan kaayo ang maong tawo Pa. Wala gani siya magpaila sa iyang ngalan sa dayon niya’ng biya. Miingon lang siya nga mobalik ra kuno siya,†matud ni Carmela.
Mibalik ang amahan ug anak sa ospital. Wala pa gihapon mahuman ang operasyon sa inahan ni Carmela. Nag-ampo sila si Carlos ug Carmela didto sa gamay’ng altar nga gipahimutang sa usa ka bahin sa ospital. - Sumpayan