Nahasiril-siril si Carmela sa lobby sa Vicente Sotto Memorial Medical Center. Wala siya masayud unsay iyang himoon. Naghinuktok si Carmela ug wala gayud kapugngi ang pagpangambak sa luha sa iyang kaapingan. Kagabii pa sila nga miabot ug ang iyang inahan gikan sa ilang lungsod sa Tabogon, usa ka gamay’ng lungsod sa amihanang bahin sa Sugbo. Gidala niya ang iyang inahan dinhi sa dakbayan kay nag-antos kini sa grabeng sakit sa tiyan.
Matud sa doktor nga mihiling kaniya, kabuthonon na kuno ang apindisaytis ug peligro nga mamatay kun dili dayon maoperahan. Naghuwat si Carmela sa iyang amahan nga moapas kay nangita pa’g kwarto didto sa ilang lungsod.
Mata’g karon ug unya, adtoon ni Carmela ang iyang inahan sa iyang katre ug dili siya makalahutay nga magtan-aw sa nagping-it niini nga nawong tungod sa kasakit. Layo kaayo og panglantaw si Carmela, mora’g walay tumong.
Nagtubod na ang mga luha gikan sa iyang mga mata. Sa hilom nagbakho si Carmela nga naghuna-huna sa iyang kahimtang. “Miss unsay imong problema,†dunay mipikpik sa abaga ni Carmela.
Sa sinugdanan nagtoo si Carmela nga ang iya na’ng amahan ang mibalik apan sa iyang pagyanghag, usa ka lalaki ang iyang nakita. “May problema ba? Basin makatabang ko nimo miss,†matud sa lalaki.
Wala dayon motingog si Carmela, iya usa nga gipahiran ang iyang mga luha. “Operahanan na lagi si Mama kay kabuthonon na kuno ang apindisaytis apan wala pa mabalik sa Papa nga nangita’g kwarta,†ni Carmela pa.
Gitutokan sa lalaki si Carmela. Tugob sa kaaghop ang tinan-awan sa lalaki ngadto sa probinsyana nga dalaga. “Atong adtoon ang imong Mama, tana,†gipikpik sa lalaki ang abaga ni Carmela.
Nagping-it gihapon ang dagway sa inahan ni Carmela. “Asa ang mga giresita sa doktor kay atong paliton,†matud sa lalaki. Mihapit sila sa nurses station. “Ma’am ipaandam ang pag-opera sa pasyente sa Bed 12 kay paliton namo ang gikinahanglang tambal,†giingnan sa lalaki ang nurse.
Nagkuyog sila si Carmela ug ang lalaki pag-adto sa botika sa Fuente Osmeña. Daku-daku g’yud ang gibayran sa lalaki sa gipalit nila nga tambal. Namalik dayon sila sa ospital dala ang tanang tambal ug medisina.
“Sigi, mobalik ra ko karong hapon. Diay kwarta kay basin og may dugang palitonon nga tambal,†sa lalaki pa nga mitunol og tulo ka tag-usa ka libo ka pesos ngadto ni Carmela.
“Hala, kadaku ani nga kantidad sir,†kadawaton-dili si Carmela. “Sigi na, dawata kay molakaw usa ko,†matud sa lalaki. Daw dili makatoo si Carmela nga may mitabang kanila aron maoperahan ang iyang Mama. -- Sumpayan