Perming magduda

Dear Tita Salie,

Have a wonderful day. Just call me Carmz, 17 years of age and still single.

Ang akong problema mahitungod kini sa akong lovelife. Duna man ko’y boyfriend nga tua karon sa Manila. Nagkalagyo mi tungod kay didto man siya nakakita og trabaho, samtang ako nia dinhi sa Cebu. Sa una dihang nagkauban pa kaming duha dinhi wala gyod kami’y problema ug malipayon pa kaming duha sa among relasyon. Kanunay mi nga manuroy nga kami rang duha bisan tuod kun kanunay lang kami kapos sa kwarta.

Pero karon, Tita, nga duna na siya’y trabaho apan nagkalagyo man mi. Ug ang nakapait niini tungod kay nahimo na man hinuon siyang seloso ug walay salig kanako. Perming magduda nga duna ko’y lain dinhi nga sa tinuod wala man gyod ka’y siya lang ang akong gihigugma.

Karon naglagot na hinuon ko kaniya ug hinayhinay nawad-an ko og gana. Dili gyod ko ganahan sa tawo nga walay sali’g kanako, Tita. Kanunay lang init ang akong ulo.

Maayo kaha, Tita, nga ako na lang siyang bulagan? Unsa may angay nakong buhaton? Palihog pasabta ko. Daghang salamat and more power. God bless.

* * *

Good day, sa dili pa nimo buhaton ang pagpakigbulag kaniya, paningkamoti una nga i-save ang inyong relasyon kay anugon kaayo nga ang maayo ninyong samahan sa una kalit lang mahanaw tungod lang sa simpleng selos nga walay basehan.

Tinuod gyod kana nga wala siyay sali’g kanimo. Tungod kay sa una dihang anaa ka lang kanunay sa iyang panan-aw wala man mogawas kining batasana. Apan karon nga dili kana niya makit-an kanunay nag-rigor ang iyang utok ug mao kanunay niyang mahuna-huna nga imo siyang ilisan. Kun siya ang imong ikadayon dilikado kaayo nga magpuyo ka sa balay nga walay bentana. Tungod kay kanunay siyang mahadlok nga unya’g sa laing lalaki ikaw makit-an, ug mao na unya kini ang sinugdan nga siya mailisan.

Busa samtang sayo pa imo na siyang disiplinahon. Apan una sa tanan ihatag kaniya ang assurance nga siya ra gyod ang imong mahalon aron naa siya’y peace of mind kanunay. Gamita ang celfon o kaha internet aron kanunay ang inyong communication. Buhata gyod ang tanan aron mawala ang iyang duda.

Pero kun wala siya’y kausaban, mao na kini ang higayon nga imo siyang bulagan ug kalimtan. -- Tita Salie