Mora’g live-in

Dear Tita Salie,

Maayong adlaw. Tagoa lang ko sa pangalan nga Angel, usa ka dalaga ug nagproblema intawon sa lovelife.

I have a boyfriend ug love kaayo nako siya. Wala ko masayod kun unsa na kining among status karon kay uyab pa lamang kami apan magtupad na man mi og higda matag gabii. And of course tungod kay ingon man niini ang sitwasyon duna na gyo’y nahitabo kanamo.

Uyab pa lamang kami apan kun atong tan-awon mora na mi og nag-live-in. Gipailaila na usab ako sa iyang mga ginikanan ug ila nakong gipatahod og mama ug papa. Makalibog kaayo kay lahi na man ang among kahimtang sobra na man sa usa ka uyab, apan dili usab tinuod nga live-in kay mag -uli-uli pa man siya sa ilaha ug ako ngadto sa amoa kun adto ko matulog sa ilaha.

Maayo man siya, Tita, apan ang problema lang nako kay medyo seloso siya. Masuko man god siya, Tita, kun duna siya’y makit-an nga pangalan sa lalaki nga naka-phonebook sa akong cellphone. Iya dayon kong dudahan nga akong uyab. Unsa may akong buhaton, Tita? Palihog pasabta ko. Thank you very much.

* * *

Dear Angel,

Mas maayo gyod nga dili pa kamo minyo imo nang masuod ang iyang mga ginikanan. Ingon man usab ang imong boyfriend ngadto sa imong parents. Kay wala kay mahimo kun dili mamahimo ka usab nga miyembro na unya sa ilang pamilya ug ang imong boyfriend ngadto sa imong pamilya. Mas maayo gyod nga karon pa lang maayo na ang inyong pagtinagdanay sa inyong tagsa-tagsa ka pamilya ug ang iyang tibuok pamilya ngadto sa imong tanang kabanay.

Ang dili lang maayo niini kay medyo nasubrahan ang inyong kasuod tungod kay nitugot lang ang inyong mga ginikanan nga magtupad kamo pagkatulog. Nganong nitugot ka man niini ug nganong nitugot man ang imong mga ginikanan niini? Hinumdomi nga dili mo pa siya bana ug dili pa kamo minyo. Wala pa nakaseguro nga kamo gyud ang magkadayon tungod kay dili nato matag-an ang mga panghitabo.

Pananglitan dili kamo ang magkadayon, kinsa man kaninyong duha ang alkansi? Maayo na lang kun dili ka pa mabuntis. Pero unsaon na lang kun mabuntisan ka niya unya dili kamo ang magkadayon?

Mas maayo seguro nga maniguro ka kun sa imong tan-aw siya na ang gusto nimong mabana planoha na ang inyong kasal bisan simple lang. Ang importante nga kasado namong duha aron klaro na ang inyong status. Ug dili ka na maglibog pa. -- Tita Salie