Dear Tita Salie,
Maayong adlaw. Tagoa lang ko sa pangalan nga Mrs. Leo, usa ka minyo ug dunay pamilya. Buotan kaayo kining akong bana ug naliwat usab ang akong mga anak kay puyra buya’g lang mga buotan pod kaayo.
Busa wala ko magproblema sa akong pamilya ug wala koy problema sa akong kaminyoon. Tungod kay proud kaayo ko nga ako malipayon sa akong kinabuhi nga usa ka minyo.
Ang akong problema kabahin kini sa akong gipamati sa akong mata. Mohapdos man god kun madugay na nakong tutok, manghang siya ug mosakit ang akong ulo. Kanunay nga maglabad ang akong ulo ug mora ko og malipong.
Usahay maglisod ko og tan-aw ug mohiyong ang akong mata. Duna sad panahon nga malipong ko ug magbarag-barag ko sa akong paglakaw. Tungod niini nagpalit ko og eyeglasses. 25 ang grado sa akong eyeglasses apan mao man lang gihapon ang akong gibati. Busa ako kining gipataasan og nahimong 50 ang grado. Apan hangtod karon mao man lang gihapon ang akong gibati, Tita.
Nganong ingon man niini ang akong pamati sa lawas bisan kun kaduha nako nag-eyeglasses? Unsa may akong buhaton? Palihog pasabta ko. Daghang salamat and more power.
* * *
Maayong adlaw, Mrs. Leo,
Kinsa may naghatag kanimo nianang grado sa imong eyeglasses ug maoy nagbuot nga imong isul-ob? Nagpatan-aw ba gyod ka og usa ka espesyalista sa mata o ikaw ra mismo ang nagbuot-buot sa imong sakit. Kay sa imong giasoy mora’g dili ko makatuo nga 25 o 50 lang ang grado sa imong mata. Kun ingon niana nga magbarag-barag na ka ug malipong o mohapdos ang imong mga mata kun motutok ka og dugay basin kun taas-taas na ang grado nga alang kanimo ug dili na 25 or 50.
Busa kun wala pa ka magpatan-aw og doctor sa mata, mas maayo nga dili ka magtag-an-tag-an ug magpa-check up gyod ka aron masuta ang tinuod nga grado alang kanimo.
Pero kun humana ka nagpatan-aw og doctor ug mao lang gihapon ang imong gipamati sa imong bata ug lawas, mas makaayo seguro kanimo kun magpatan-aw ka og laing doctor. Kay tingali kun dili lang ang imong mata ang dunay problema. Mas maayo seguro nga matan-aw ang ubang parti sa imong lawas, ug matan-aw usab ang imong dugo, tingali kun highblood ka, ang imong blood sugar or cholesterol.
Abi god nimo kun may edad na ang tawo daghan na gyod kita og dapat bantayan. Kinahanglan usab ang pagpugong sa mga pagkaon kun kontra kini sa imong sakit. –- Tita Salie