Ang pagtulid-id ni Pinoy sa naghiwi nga dalan

Daghan ang mipagakpak sa hilabihan nga kahinangop sa tinguha ni Presidente Benigno Aquino III sa “matuwid na daan” nga maoy hinungdan nga ang kanhi mga opisyal sa kagamhanan nga gipangulohan ni Presidente Gloria Macapagal Arroyo nakasinati sa nagpungasi nga mga kaso nga gipasaka sa Sandiganbayan.

Nunot sa ilang pagpagakpagak maoy nagsaling-it sa ilang kaisipan ang paglimpiyo sa mga buhatan sa kagamhanan nga gisalimbogan sa mga anomaliya nga gipasiugdahan sa kurakot nga mga opisyal sa kagamhanan nga gialigar nga gibuhat sa miaging administrasyon.

Ang pagpagakpak sa katawhang Pilipinhon ilang giduyog sa hugtanon nga suporta nga maoy hinungdan nga sa mga survey nga gipasiugdahan sa pribadong pundok sa katilingban kanunay kining nag-una kun ang pagsalig na sa katawhan maoy atong pagahisgotan.

Gipakita sa presidente ang kamatinud-anon sa iyang panerbisyo ubos sa prinsipyo nga walay pagpalabi sa katawhan nga iyang gialagaran sanglit ang tanan managsama kabus ka man o adunahan pinaagi sa pagsubay sa giluwatan niyang mga pulong nga  “walang wangwang.”

Gipakita ni Presidente Aquino ang matinud-anon niyang pagsilhig sa mga buhatan sa goberno sanglit dako man ang iyang tinguha nga malimpiyo ang nangalisbong baho sa nagkadugta na nga binuhatan sa nangaging opisyal sa kagamhanan.

Gilauman sa katawhang Pilipinhon nga makab-ot sa presidente ang damgo niining pagtul-id sa nangahiwi na nga buhatan sa kagamhanan sanglit alang kaniya “Kung Walang Kurap, Walang Mahirap!”

Ang nakaparat lang kay luyo sa tabil sa iyang tinguha nga pagtul-id sa nangahiwi nga dalan  sa pangagamhanan sa takulahaw lamang usab mitumaw ang mga taho sa nagkadaiyang anomaliya nga gihimo sa iyang mga sinaligan.

Ang pagkawagtang sa sinakong bugas sa Bureau of Custom ug ang gikataho nga kontrobersiya sa mga computer sa Department of Transportation and Communication (DOTC) ug uban pa nga maoy hinungdan sa pagtumaw sa mga pangutana sa katawhan nga “mahingpit ba kaha sa presidente ang pagsubay sa “Matuwid na Daan?!”