Gula 6
Susama g’yud sila si Kent ug Daisy sa managhinigugmaay nga nagdeyt didto sa mao nga lugar. Gipunit ni Daisy ang sweet corn, iyang gipanitan ang mais-tinanok apan dili siya makabali sa punoan sa pakaw gikan sa iyang pakpak.
Gikuha ni Kent ang mais gikan sa kamot ni Daisy ug gibali ang dapit sa punoan sa pakaw. “Salamat kaayo Kent,†paraygon nga tingog ni Daisy diha nga gitunol pagbalik sa reporter ngadto kaniya ang tinanok nga mais.
Takulahaw lang nga nagkatinutokay silang duha ug nagpahiyomay. “May posibilidad ba nga maangkon ko ang imong gugma karon nga patay na ang imong boyfriend?†nahimong seryoso og gamay ang tonada sa tingog ni Kent.
“Sure... nganong dili man mahimo? Dia na man gani ta nagdeyt na man bisan og wala ka pa manguyab nako,†daw nangomedya pa gani si Daisy kang Kent.
Nagpalain usa sila og gipanagsultihan. Nakabantay na si Kent nga sigurado na nga maangkon niya ang pagbati ni Daisy. Human sila makakaon sa ilang pinalit nga mga pagkaon, nagkalingaw sila paglantaw sa kabukiran didto sa barandilya sa waiting shed.
Dili makatoo si Daisy nga miabot sila sa mao nga lugar. Layo na kaayo gikan sa ilang nahimutangan ang kinatas-an nga bungtod nga makita sa kinapusoran nga bahin sa dakbayan. Nagmatuod kini sa kalayo na sa dapit nga ilang giadtoan.
Mianam-anam na pagtsansing si Kent kang Daisy. Midip-ig siya ngadto sa lawas sa dalaga ug gikuha niini ang wala niya nga kamot. Giduwa-duwaan niya ang kamot ni Daisy samtang padayon sila nga naglantaw sa kabukiran.
“Maayo manglakaw ta sa unahan Daisy ug ibilin lang nato dinhi ang motor kay total wala may manghilabot dinhi,†giingnan ni Kent ang dalaga. Misuot sila niadtong kakahoyan kay mora’g dunay bung-aw sa ubos ug gusto nila nga tan-awon.
Nakasigpat si Kent nga adunay gamot sa dakung kahoy nga maayo kaayong pagkaporma nga lingkoranan alang ra gayud sa duha ka tawo. Didto sila nagpahimutang.
Gikan sa ilang nahimutangan, malantaw gihapon nila ang kabungtoran sa unahan ug sa ilang luyo ang karsada nga panagsa adunay moagi nga mga sakyanan.
“Kinahanglan pa ba nga manguyab ko nimo Daisy? Nakasabot ka na tingali nga nakagusto ko nimo bisan sa una ko pa lang nga pagkakita niadtong gi-interview ka nako,†matud ni Kent.
Mipahiyom si Daisy nga nakadungog sa gisulti ni Kent kaniya. “Unya, kinahanglan pa ba ‘sab diay nga motangdo ko nimo nga wala ka man molitok sa mga pulong sa pagmahal ngari nako?†ni Daisy pa.
Nagkataw-anay silang duha. Gigakus ni Kent si Daisy. “I love you Daisy,†matud ni Kent dungan sa pagpatik og hawok sa aping sa dalaga. - Sumpayan