Badlongon diay

Dear Tita Salie,

Maayong adlaw ug kumosta? Tagoa lang ko sa pangalan nga Jane, 21 years of age, duna koy anak nga duha kabuok. Kasal ko sa huwes, Tita, ni Jonas nga akong bana ug nagpangedaron na siya karon og 37 anyos.

Malipay man unta ko kay medyo matured na ang akong bana kay may edad na man siya ug medyo layo-layo ang agwat namong duha.

Apan wala man ko magdahom nga wala man diay hinungdan kining akong bana, badlongon man kaayo ug wala pay pagpakabana sa iyang pamilya ug mga anak. Kusog pa gyod kaayong mogasto sa iyang kwarta.

Dihay usa ka higayon ni-loan siya og kwarta sa iyang trabahoan kantidad og 3,000. Wala gyod ko kakupot sa kwarta bisan kun ako ang iyang asawa. Siya ra gyod ang nasayod niini. Ug paglabay sa 3 ka adlaw human niya nadawat ang iyang gi-loan nahurot na usab ang iyang kwarta. Sakit kaayong hunahunaon tungod kay wala man gyod ko’y nakitang butang nga iyang napalit sa iyang kwarta. Siya ra ang nasayod kun giunsa niya kini pagasto. Unsa may akong buhaton, Tita? Palihog pasabta ko. Thank you very much and God bless.

* * *

Maayong adlaw usab kanimo Jane,

Kumusta na man ang dagan sa atong pagpuyo? Bisan kun sa huwes lang kamo nakasal apan ikaw na gyod ang legal nga asawa ni Jonas ug dili na siya puyde nga magminyo sa lain. Ug isip iyang asawa ikaw ang Rayna sa inyong panimalay ug ikaw ang dunay katungod kaniya.

Sa dili ka pa mangisog sa imong bana aplaye una kini og lahi nga style. Bisan pa man kun medyo nagbukal na ang imong dugo ug miulbo na ang imong kaspa pugngi lang gihapon ang imong kaugalingon nga mangaway kaniya. Yes, tinuod nga lisod kaayo kining buhaton  apan I am pretty sure nga kaya nimo kining buhaton.

Dapat magbilin kang kalmado sa maong sitwasyon bisan naglagot ka na apan ayaw kini ipakita kaniya. Maoy ipakita ang labing nindot ug maayo nimo nga batasan. Alagari siya inig abot sa balay, parayge kanunay sama sa usa ka iring nga nagsige og bai-id sa iyang amo. Pakig-estorya kaniya kanunay mahitungod sa iyang trabaho, sa iyang mga plano ug sa inyong plano sa pamilya hangtud nga mohumok ang iyang dughan ug nakaseguro ko nga wala na siya’y laing hunahunaon kun dili ang iyang pamilya ug mga anak.

Ayaw pagsige’g kasuko kay mosamot hinuon nga molakaw siya ug adto sa imnanan siya kanunay mabuntagan. -- Tita Salie