Tsiks — Tirada - Gula 4

“Nakita ko nga nagkitabkitab ang imong mga ngabil samtang nag-atubang ka sa lubong sa kanhi mo boyfriend, unsay imong gisulti kaniya?” nagpakisayud si Kent kang Daisy. Mipahiyom si Daisy nga miatubang kang Kent.

“Ako siya nga giingnan nga kun wala pa siya magbinuang nako tingali buhi pa siya ug dili kami magkabuwag. Ako na lang siya nga giingnan nga hatagan ko niya’g kalinaw ug tabangan nga makakita og laing lalaki nga matuod nga mopangga nako,” ni Daisy pa.

Wala dayon motingog si Kent. Taud-taud gibuak ni Kent ang kamingaw kanilang duha dihang didto na sila sa gawas sa menteryo. “Ako ‘sab nangaliya nga pasayloon unta ang imong boyfriend sa iyang paghikog ug nga tabangan ko niya nga maangkon ko ang imong gugma,” matud sa reporter.

Mitig-ik si Kent kay gikusnit ni Daisy ang iyang kilid. “Bugal-bugalon ka man diay Kent,” matud ni Daisy nga milingi sa radio reporter. Pwerteng nakapamalibad ni Kent nga wala siya magbugal-bugal sa dalaga ug nga tinuod nga may gitagoan siya nga pagbati kaniya.

“Dali na, sakay na kay dili maayo nga anhi ta dinhi magsultihanay kay basin og kasuyaan pa ta sa namatay nimo nga boyfriend,” nangomedya na si Kent sa dalaga. Human makaangkas si Daisy sa motorsiklo, mipasirit dayon siya sa pagpadagan.

“Asa man ta manuroy Kent?” gipangutana ni Daisy ang bohemyo nga reporter. “Suroy ta’s bukid kay total kusog man motungas ning akong motor. Adto ta sa Cantipla kay tabo ron didto,” giingnan ni Kent ang dalaga.

Wala na motingog pa si Daisy nga nagpasabot nga wala siya’y pagsupak. Tuod misirit pagpadagan si Kent sa iyang motorsiklo. Tungod kay kusgan man kaayo ang makina sa motorsiklo ni Kent, gikilaw-kilaw lang sa pagtungas nila ang tangason nga karsada paingon sa bukid.

Nakabantay si Kent nga migakus si Daisy kaniya ilabi na kun moaksyon na og handag ang motorsiklo nga tuyoon gayud ni Kent diha sa mga eskena. Wala sila’y tingog-tingog ug ang tingos lang sa makina sa motor ang ilang mabati.

Nakasabot si Kent nga nalingaw kaayo si Daisy nga misud-ong sa mga talan-awon sa bukid. “Layoa na nato Kent uy, unsa na man ning dapita?” wala makapugong pagpangutana si Daisy dihang miabot na sila niadtong dunay dagku nga mga balay.

“Balay kana ni Congressman Del Mar ang anaa sa ibabaw,” gitudlo ni Kent sa wala niya nga kamot ang puti nga balay nga nagbuntaog sa ibabaw nga bahin sa karsada sa Barangay Pung-ol, Sibugay. Mihunong si Kent sa unahan ug gilantaw nila ang taas nga bungtod sa layo. “Adto ta nianang lugara.” - Sumpayan