Sama sa nangaging pagbukas sa klase, ang kakulang sa classroom ang misugat na usab sa mga estudyante ug mga ginikanan sa tulonghaang pangpubliko, sa karong school year 2013-2014. Naglisod gayod ang gobiyerno sa pagsulbad niini. Kun sabton gayod, dili unta maingon niini ang kahimtang kun ang kagamhanan naghunahuna sa tinud-anay nga alternatibong solusyon sa maong problema.
Nadugangan pa ang giatubang nga problema kay hangtod ang mga magtutudlo kulang usab. Pastilan. Pagkaluoy sa mga bata nga nagdasok sa usa ka classroom. Kun adunay sakit ang usa, lagmit daling matakdan ang uban.
Dugang pa gayod niini, daghan usab ang mga estudyante nga namalhin sa gobiyernong tulonghaan gikan sa pribadong eskuylahan kay naglisod na ang ilang mga ginikanan sa pagpatungha sa private school tungod sa kamahal na sa balayranan.
Angay lang gayod unta nga hatagan og gibug-aton sa atong gobiyerno ang kamahinungdanon sa edukasyon sa usa ka tawo. Himsog ang nasod kun ang mga tawo nga nagpuyo niini adunay hustong kaalam sa pag-uswag ug sa maayong kaugmaon. Ug mahitabo lang kini kun ang mga tawo kahatagan og igong edukasyon.
3 Milyon ang walay trabaho
Sumala sa ulahing survey sa National Statistics Office (NSO), miabot na sa tres milyones ang mga Pilipino nga wala’y trabaho dinhi sa nasod. Nahitabo kini kutob niadtong bulan sa Abril.
Misaka ang unemployment rate karong tuiga gikan sa miaging tuig. Sa Abril 2012 adunay unemployment rate nga 6.9 porsiyento. Samtang sa Abril 2013 adunay unemployment rate nga 7.5 porsiyento.
Ang maong kahimtang nahitabo tungod sa pag-ubos sa panarbaho sa sektor sa agrikultura. Kining maong situwasyon angay gayod nga kabalak-an. Kanunay gisulti sa gobiyerno karon nga misaka ang ekonomiya sa nasud. Apan wala kini mabatyagi sa kinabag-ang Pilipino nga hangtod karon nag-antos sa kalisod sa pagpuyo.
Kun daghan ang walay trabaho sa nasud, dili na ikahibulong kun nganong misaka usab ang kriminalidad sa Pilipinas. Hinuon, gisaad man ni NoyNoy nga adunay mga trabaho nga moabot alang sa mga Pilipino.