Nanumbalik ang matuod nga gugma .

Magkaklase sila si Roy ug Gina niadtong nagtungha pa sila sa hayskol. Second year hayskol pa  sila niadto. Maanyag si Gina mao nga gihigugma siya ni Roy. Alang kang Roy, wala nay lain pang babaye sa iyang kinabuhi gawas kang Gina.

“Tinuod kana, Gin,” pulong ni Roy kausa dihang nagkasultihanay silang duha. “Ipasalig ko kanimo nga dili na gayod  ako mahigugma sa lain.”

“Hinaot  unta nga tumanon mo ang imong gipasalig kanako,” tubag  ni Gina. “Atong paningkamotan nga molampos kita sa atong pagtuon para mahimong masanag ang atong ugma.”

Mao kadto ang ilang pagsinaaray, mga saad nga matud nila, kamatayon ra ang utlanan. Nagpadayon sila sa ilang pagtuon inabagan sa ilang mga ginikanan, ilabi na ang ilang mga ginikanan nga boto sa ilang paghinigugmaay.  Para sa ilang mga ginikanan, wala sila’y supak sa ilang gugma butang nga gikalipay nila.

Apan, miabot ang bagyo sa ilang kinabuhi. Usa ka babaye ang miabot sa kinabuhi ni Roy. Si Mara nga anak sa usa ka adunahan nga dili kaayo layo gikan sa ilang dapit.  Nahigugma si Mara kang Roy ug mipasalig kini nga siya ang motubag sa tanan niyang galastohon sa eskuwelahan.

Tungod niini nalimot si Roy kang Gina ilabi na dihang giagni ni Mara nga didto siya motungha sa hayskol sa siyudad ug siya ang mogasto. Kinsa man kaha ang lalaki nga dili madani niini nga tanyag?

Mibalhin si Roy pagtungha gikan sa ilang dapit ug miadto sa siyudad hangtod nga wala na sila magkita ni Gina sulod sa daghang mga katuigan. Nahunong usab si Gina sa pagtungha tungod kay sukad mawala si Roy, nawala ang iyang gana sa pagtuon.

Ug milabay ang mga katuigan. Nasayran ni Gina nga  nagkadayon gayod diay ang duha dihang pareho silang mitapos sa high school ug sa  ilang paggraduwar, gihimo dayon usab ang ilang kasal. Wala lagi problema kay tubig-tubigan man ang ilang mga ginikanan. Apan, sumala usab sa balita, pipila ka bulan human sa ilang kasal, nabangga sila sa gisakyan nga motorsiklo. Patay ang asawa ni Roy ug maayo na lang kay nakalingkawas siya gikan sa kamatayon.

Si Gina, nakasulod sa trabaho didto sa Saudi ug pipila siya ka tuig didto. Miuli si Gina gikan sa Saudi ug nagkita silang duha diha na sa ilang dapit. Nagsultihanay silang duha ug nasayran ni Roy nga dalaga  pa si Gina. Nanumbalik paglab-as ang ilang gugma.

“Gina, kun hatagan mo ako’g laing higayon, magminyo kita total husto na man ang atong panuigon, ang tinuod, sukad pa kaniadto, kanunay ka gihapon nga gihigugma ko. Busa, hinaot nga hisabtan mo ako,” matud ni Roy.

Tungod kay daan na silang nagkahinigugmaay, mao nga dali silang nagkasinabtanay. Karong panahona, tulo na ang ilang mga anak ug nagpabilin buotan sila sa usa’g-usa. (Kataposan)