Talawan si Manoy Juan

Nalipay ko nga ning hapona, gikuha ko ni Manoy Juan sa among eskuylahan sa Grade Six Section One sa among baryo. Nasayod ko nga gusto sab si Manoy makigkita sa adviser kong maestra nga si Mam Fe nga dugay na niyang gipangulitawhan, sanglit bag-o lang siya nahiabot gikan sa siyudad.

Gradwado si Manoy Juan sa kursong Agrikultura sa among lungsod ug atua na magtrabaho sa opisina sa Department of Agriculture sa siyudad sa Sugbo.

“Manoy, maayo kay gikuha ko nimo ron...!”

“Aron sab mi magkita ni Mam Fe, Dong Glen...!”

“Daan pa lagi ko, Manoy! Nakita kong nagsultihanay mo ganiha si Mam Fe...!”

“Oo, Dong Glen! Ug pabisitahon ko niya sa ilang balay karon gabii!”

Unya, di ka mahadlok nga padayon ra bang nangulitawo si Ludoy niya, ang bagsik dinhi sa atong baryo nga kanunay lang mangulata nimo kanhi....?”

“Aw, di lang gihapon ko mosukol niya, Dong Glen...!”

“Talawana gyud nimo, Manoy, uy...!”

Kaniadto pa kong naglagot ni Manoy Juan sa wala pa siya matrabaho sa siyudad. Kanunay lang siya pareglahan ni Ludoy uban sa duha niini ka kaubang estambay sa among baryo sa Kanturatoy, ilabi na nga magkaribal silang duha sa pagpangulitawo kang Mam Fe.

Gulpig-bun-og ang nahiagoman sa talawan kong magulang. Hasta sab sila si Tatay Tabal ug Nanay Titay, mibati og kaluoy kang Manoy Juan nga kanunay lang pareglahan nilang Ludoy ug kaubanan. Duha ra man god ming mga anak nilang Tatay Tobal ug Nanay Titay. Si Manoy Juan 23 na ug ako 12 anyos pa.

Napahunong mis Manoy Juan paglakaw sa dalan, dihang nalantawan namong misugat kanamo sila si Ludoy ug duha niya ka kaubang bugoy sa baryo.

“Hala, Manoy! Pareglahan na sab ka nilang Ludoy...!”

“Ayaw kabalaka, Dong Glen! Di gihapon ko mosukol, uy....!”

Gitulisok dayon ni Ludoy si Manoy Juan.

“Bag-o pa gani kang miabot gikan sa siyudad, nakigkita man dayon ka ni Mam Fe! Makigribal gyud ka nako! Di ko motahod nimo  bisan pag propesyonal ka! Angay kang pangagan...!” ug gisenyasan dayon ni Ludoy ang duha niya ka kaubang bugoy sa pagdasmag kang Manoy Juan. Nagdali kong mipadaplin sa dalan. Nakita kong nanukad si Manoy Juan. Mosukol na diay siya   nilang Ludoy!

Kilatnon ang mga lihok ni Manoy Juan. Milupad ang iyang mga flying kick nga milagubo sa dughan sa duha ka alalay ni Ludoy. Nahasarasay ang duha. Unya, gisundan kini ni Manoy Juan og nag-aso-asong karate chop sa tangkugo sa duha ka hinanib ni Ludoy nga nahagba sa dalan. Midasdas dayon si Ludoy. Apan gisugat kini ni Manoy Juan sa istrit niyang kinumo nga mitama sa agtang ni Ludoy. Mora’g kumo ni Pacquiao ang kakusog sa kumo ni Manoy nga maoy nakapahapla ni Ludoy sa dalan, tupad sa iyang duha ka kauban. Silang tulo wala na makabarog!

Abtik kong giduol si Manoy Juan. Miaper ko niya. Hanas na diay si Manoy sa martial arts. Ug dili na talawan si Manoy Juan. (Katapusan)