Caroline

Nahinangop kaayo si Carol nga wala siya mabilanggo tungod sa pagtabang kaniya ni Artemio, ang polis nga nadistino sa Intelligence and Investigation division sa Cebu City Police Office.

“Gusto ko nga makabawos nimo Art. Apan mangita usa kita og tawo nga kabaligyaan nato niining mga alahas nga atong gidala kay para ‘sab mabayran tika,” giingnan ni Carol si Artemio.

“Tambag nako nimo Carol ayaw na lang paggasto’g daku kay may problema ka pa ra ba kay kinahanglan ka pa mangita og abogado nga mogunit sa imong kaso,” matud ni Artemio nga daw nalooy kang Carol.

“Kabuotan nimo uy. Sigi, kun oki ra nimo Art, adto lang ta sa balay kay duna man ko’y giandam nga pagkaon didto nga wala makaon kay imo ko nga gidakop,” matud ni Carol nga nagngisi samtang milingi sa polis.

Nakahinuktok kadiyot si Artemio. “Unya dili kaha lainon pagsabot sa imong mga silingan nga makakita nga nagpasulod ka’g lalaki sa imong balay?” ni Artemio pa.

Abtik kaayo nga nakahuna-huna og paagi si Carol. “Kun dunay makakita ipaila-ila ko ikaw nga akong ig-agaw para dili nila lainon pagsabot.” Tuod, misakay sila sa awto ni Artemio ug misirit paingon sa Labangon.

Giparking ni Artemio ang iyang kotse daplin sa Salvador Street dili layo sa Cebu City Science High School kay lapad ang maong karsada.

“Manglaktud na lang ta diri Art,” matud ni Carol nga miuna pagsuot niadtong daghang kabalayan. Wala madugay didto sila mitangka atubangan sa pultahan sa balay nila ni Carol.”

Wala gayud mosipyat ang kabalaka ni Artemio kay dunay mga tawo nga nakakita nga nagkuyog sila si Carol. “Ako diay ni’ng ig-agaw si Artemio,” paila ni Carol kang Art ngadto sa duha ka babaye nga nagbarug duol sa iyang pultahan. Igo lang mingisi ang mga babaye.

“Dali na Art,” giagda ni Carol si Artemio nga mosulod na. Gisundan sila sa pagtan-aw sa duha ka babaye. “Wala kaha kadto sila magduda? Mitoo kaha sila nga imo ko’ng ig-agaw? Kuyawan ko kay basin og moreport sila sa imong bana nga tua sa abroad,” ni Artemio pa.

“Kun dili sila motoo, aw bahala sila,” matud ni Carol. Gi-on ni Carol ang TV set aron nga malingaw si Artemio samtang giandam niya ang ilang pagkaon. Giliraw ni Art ang iyang mga mata sa palibot.

Wala magdugay, gisangpit na siya ni Carol aron magdungan na sila pagpangaon. “Kataw-anan niini’ng hitaboa uy, ganina gidakop pa tika apan karon nagdungan na kita sa pagpangaon,” ni Artemio pa nga mipahiyom.

“Ingon ana g’yud ang panahon, dili lang mahibaw-an,” dali nga tubag ni Carol. -- Sumpayan