Lunop ug Baha

Gula 5

Pagkaugma sayo kaayo nga nagkita ug nag-uban pag-adto sa City Hall sila si Siegfred ug Pamela. Nasayran ni Siegfred gikan sa security guard nga wala pa moabot ang mayor.

Naghuwat usa sila og kapin sa tunga sa oras. Pag-abot sa mayor gisinyasan niini ang usa ka staff sa mayor’s office nga atimanon ang panginahanglan nila ni Siegfred.

Dali ra kaayo nga naasikaso ang dukomento aron matabangan sa City Hall ang bayranan sa ospital sa inahan ni Pamela. “Salamat g’yud kaayo Fred ha? Nasulbad g’yud tawon ang akong problema,” matud ni Pamela.

“Adto ka angay nga magpasalamat ni mayor ug ni City Administrator Jose Marie Poblete nga mipadali sa pag-asikaso sa mga dukomento nato sa CHAMP,” ni Siegfred.

“Ilado ka diay dinhi sa City Hall Fred? Nganong mora man og suod mo si Mayor Rama ug kadto si Atty. Poblete,” wala makapugong si Pamela sa pagpangutana kay nahibulong siya nganong mora’g suod man sila si Siegfred ug ang mga opisyal sa City Hall.

Wala motug-an si Fred kun ngano nga kaila niya ang mga opisyal sa City Hall. Tuod giasikaso dayon nila ni Pamela ug Siegfred ang bayranan sa iyang Mama sa ospital.

“Pwede na man nga mopauli si Mama kay maayo na man ang iyang gibati,” giingnan ni Pamela si Siegfred. Nananghid si Fred nga mobiya usa kay motrabaho na siya.

“Asa ka diay magtrabaho Fred?” ni Pamela pa nga mitutok ni Fred dungan sa paggunit sa iyang bukton. Igo lang mipahiyom si Fred apan wala motug-an.

Pagkagabii, mi-text si Pamela kang Fred. Nagpahibalo kini nga nakagawas na ang iyang inahan sa ospital ug nauli na sila sa balay. “Dili g’yud ko makalimot sa imong daku nga natabang kanako Fred,” ni Pamela pa.

Gituyo ni Fred nga wala tubaga ang text message ni Pamela. Milabay ang pipila ka adlaw nga bisi usab kaayo si Fred sa iyang trabaho. Wala na siya makatext kang Pamela.

Usa ka Sabado, dili kaayo bisi si Fred sa iyang trabaho kay wala may opisina. Sagad mata’g Sabado, dali ra nga mahuman sa trabaho si Siegfred. Wala magpaabot si Siegfred nga mi-text kaniya si Pamela.

“Hi Fred, miss u.” Miginhawa’g lawom si Siegfred human niya mabasa ang mubo kaayo nga text message ni Pamela. Dayon nakapahiyom si Siegfred nga mi-reply sa mensahe sa dalaga.

“Really? miss ko nimo?” gibawsan ra ‘sab ni Siegfred og mubo nga mensahe si Pamela. Alas tres pa sa hapon nga migawas na si Fred sa opisina ug misulod siya sa atbang nga department store.

Nadunggan ni Fred nga mitingog na ‘sab ang message alert sa iyang selpon. - Sumpayan