“Happy Mother’s Day, Ma,†ni Cynthia ngadto sa iyang Mama Almira. Mapahiyumon si Cynthia nga nagtapis og tualya nga nigawas sa banyo. Nanghumot nga sabong humot kay bag-ong huma’g kaligo. Si Almira nagkadulusingot nga nag-mop sa sawog nga tiles sa ilang sala. Nagpaniid lang si Danilo nga kapikas ni Almira, samtang nagbasa og Banat News nga naglingkod sa sopa sa sala karong buntaga.
Way ganang motagad si Danilo sa iyang kinamaguwangang anak. Nakaingon siya’s iyang kaugalingon nga si Cynthia usa ka anak nga way kalooy sa ginikanan.Paggradwar niya sa kursong Accountancy, naminyo dayon. Napugos na lang kay mabdos na ma’g lima ka buwan. Ang nabana, pareha niya nga dawo sab. Dagko siya’g suweldo kay puro nagtrabaho sa Call Center. Apan ilang kita para ra nila. Igo ra’s panghindik, load sa selpon ug facebook. Di gani kapalit bisa’g pan na lang inig suweldo nila.
Sa ilang duha ka anak nga sila si Fe, 7 anyos, Lira, 2 anyos, si Almira ang nahimong yaya. Wa pay sweldo. Mao pay makagasto sa panginahanglan sa mga bata. Ipon man gihapon nila ilang anak nga minyo na. Si Danilo nahimong drayber ni Fe, kay hatud kuha sa eskuylahan. Wa say suweldo. Ila pang gasolina. Ang nakaparat kay unrecognized ug unappreciated ilang kahago.
Imbis nga wa na sila’y trabaho kay retirado na’s gobiyerno ang magtiayon ug may gamay’ng binulan nga pension, back subject nila ang pag-atiman sa mga apo. Apan mao lagi. Mag-antos sila kay malipay man sab silang masood sa mga apo. Apan ang mga ginikanan sa mga bata, way bisan diyutay nga pulong sa pagdayeg sa gibuhat sa lolo ug lola.
Kun gusto ni Cynthia nga malipay iyang inahan sa Mother’s Day, dili kay mao lang na iyang buhaton. Kulang ang pag-greet lang og Happy Mother’s Day. Dili sinsero paminawon.
Niurong sa pag-mop si Almira. Niyahat. Nitutok sa anak. Nipahiyom. “Same to you, anakâ€, ni Almira. Inahan na man sab si Cynthia. Ug nipadayon si Almira sa iyang gibuhat. Mapahiyumon gihapon si Cynthia nga nisulod sa lawak aron mag-ilis.
Nipasiklap si Almira ni Danilo. Alang-alang mopahiyom o mangyamiid si Danilo. Nakadayeg gyud siya sa kapasensiyosa sa iyang kapikas. Inahan gyud siya sa kanunay’ng panabang. (Kataposan)