Lunop ug Baha

Kalit lang mibunok ang kusug kaayo nga uwan mao nga napugos si Siegfred pagpasilong sa aseras sa D. Jakosalem. Wala g’yud magdugay miawas ang sapa nga nahimutang kilid sa daku nga department store ug milanap kini sa karsada.

Nakapanglingo-lingo si Siegfred nga nagsud-ong sa talan-awon. Padayon pa gayud ang pagbunok sa kusog kaayo nga uwan ug natan-aw ni Siegfred nga baga pa kaayo ang itum nga dag-om nga nagpasabot nga dugay pa motuang ang uwan.

Takulahaw lang milawom na ang tubig nga milanap sa karsada apan duna gihapo’y mga sakyanan nga misungasong sa tubig. Dunay mga awto nga nagpadaplin ug wala molahos pagsungasong sa lawom nga tubig tungod sa ospisina sa Banat News ug Freeman.

Nakita ni Siegfred nga adunay usa ka kotse nga gimaneho’g babaye nga mihunong tungod sa iyang nahimutangan. Gisinggitan kini sa mga tawo nga dili magpatuga-tuga kay sigurado nga mapawong gayud kini sa tubig.

 Apan igo lang mipahiyom ang babaye ug nagpanglingo-lingo, dayon mipasiklap sa iyang relo sa bukton. Mora’g adunay gidalian nga dili gusto nga malangan.

Tuod miarangkada ang kotse sa babaye kay daw mihunat ang pag-andar ang makina. Dayon misungasong kini sa tubig. Hilom ang mga tawo nga namasilong sa aseras nga nag-obserbar lang kun makalahos ba ang kotse sa babaye.

Apan wala gayud magsilbi kay nahunong kini diha gayud sa eskena V. Gullas ug D. Jakosalem. Nakasiguro si Siegfred nga nasudlan og tubig ang makina agi sa iyang tambutso.

Bana-bana ni Siegfred nga anam-anam na nga gisulod sa tubig-baha ang sulod nga bahin sa kotse. Wala na kaayo mobunok ang kusog nga uwan apan lawom pa gihapon ang tubig.

Gihukas ni Siegfred ang iyang sapatos ug gilulho ang iyang karsones. “Nang, pabilina ko sa akong sapatos bi kay tabangan nako kining babaye nga napagngan sa makina ang iyang awto,” giingnan ni Siegfred ang tindera sa aseras.

Miubog si Siegfred paingon sa awto. Miabli ang bildo sa kotse. “Ato ni nga itulod ang awto paatras kay lawom pa kaayo sa unahan mosamot ni nga masudlan og tubig ang makina,” giingnan ni Siegfred ang babaye.

“Unya manaug ko?” tubag sa babaye. “Ayaw, ayaw pagkanaug kay kun ablihan nimo ang pultahan mosulod ang daghang tubig. Diha ka lang,” matud ni Siegfred. Dunay pipila ka mga batan-on nga nangaligo sa uwan ug nalingaw nga nag-ubog-ubog sa baha. Gitawag sila ni Siegfred. “Dali dong, tabangan nato kini pagtulod, bayran ta mo.”

Tuod, natulod ra nila ang awto ug didto nila kini gipahimutang sa karsada paingon sa simbahan sa Cathedral. “Moandar pa kaha kini pagbalik ang akong awto?” gipangutana sa babaye si Siegfred.  (Sumpayan)