Legal counsel si Atty. Terence Ulab sa Lonok Enterprises, Inc. usa ka land developer. Kalabot sa iyang trabaho isip manlalaban sa maong kompanya, nahigala niya ang mga dagkong opisyales niini. Lakop na si Mr. Bert Molbon, vice-president ug iyang kapikas ug sekretarya nga si Anita. Mga mestiso Katsila. Apan mora’g Amerkano ug Amerkana ilang mga hitsura.
Sa panabot ni Terence, namakasyon ang bana’g asawa karong semanaha sa Sumilon Island. Apan ning sayong buntag, nakadawat si Terence og tawag sa telepono sa ilang balay, gikan ni Mr. Molbon. “Pasayloa ko nga sayong nanawag nimo, attorney. Di na kahulat og dugay akong isumbong nimo†ni Mr. Molbon sa pikas linya. Bag-o lang nahumag kaligo si Terence. Nagtapis pa’g tualya.
Gisaysay ni Mr. Molbon sa telepono ang nahitabo. Aircon nga bus ilang gisakyan sa South Bus Terminal. Unipormado ang driver, conductor ug truck boy. Pareho sila’g mga uniporme tulo. Puro puti nga polo. Pagsakay sa managtiayon, gidawat sa truck boy ang ilang tagsa ka bag. Nilingkod sila luyo sa drayber. Unya, ilang mga bag, gibutang sa truck boy sa ulohan dili layo sa ilang luyo. Ang truck boy nga nag-unipormi og pareha gyud sa drayber ug konduktor, maoy nanawat sa mga karga sa mga pasahero.
Dangtag pila ka minutos human nilarga ang bus, nihunong kini sa stop light. Niabli ang pultahan.Unya, nanaug ang truck boy nga nagdala og sako nga mora’g puno sa bugas. Nilarga ang bus pagberde na sa suga sa trapiko.
Dihang dunay gustong tawgon sa selpon si Mr. Molbon, usa pa siya kaamgo nga nahanaw ilang duha ka bag. Gipaurong niya ang bus sa sunod lungsod. Gipa-blotter niya ang nahitabo. Ninigar ang drayber ug konduktor, nga wala sila kaila sa truck boy. Nila pa, duha ra silang empleyado sa bus line, nga nagtrabaho ining bus. Wa kono’y labot ang truck boy. Tungod sa hitabo, wa ka-enjoy sa bakasyon ang managtiayon.
“Unsay sulod sa imong bag?†ni Terence. “Selpon, shades, camera nga digital, laptop, mga sinina ug ubang personal nga gamit†ni Mr. Molbon. “Magkita ta’s opisina karong alas nuybe. Preparahan dayon nato’g complaint. Dako’g tulobagon ang bus company sa maong hitabo. Tataw nga nakigkonsabo ang drayber ug konduktor sa kawatan nga nag-uniporme og pareha sa ila†ni Terence. Gibutang ang telepono. Ug nagdali siyang nag-ilis. (Kataposan) (Sa gusto’g libreng konsulta, dad-a ning pahina sa sugilanon sa opisina sa tagsulat, sa Sabado’s buntag)