Pabulagan gyod

Dear Tita Salie,

Hello, Tita, ug komusta? Panagsa ra gyod ko maka okasyon og basa sa imong column tungod kay dili man ko magsige og palit niini. Pero sa unang higayon nga nakabasa ko sa imong lindog ganahan na kaayo ko. Pero wala man ko’y budget kanunay aron akong ipalit og Banat News.

Tagoa lang ko sa pangalan nga Ms. Lonely, Tita, usa ka dalaga. Ang akong problema mahitungod kini sa akong lovelife ug maoy nakahatag kanako og kagul-anan karon.

Duna man gud koy boyfriend karon nga love gyod kaayo nako. And I am sure nga mao pud ang iyang gibati ngari kanako. Tungod sa akong dakong gugma ngadto kaniya akong nahatag kaniya ang akong pagkababaye. Apan human sa maong hitabo nasayran sa among tagsa-tagsa ka pamilya ang among relasyon. Daw nahugno ang among kalibotan dihang dakong supak ang among mga ginikanan sa among relasyon.Maoy  gusto nila nga magbulag mi, Tita, tungod kay paryente pa kuno ming duha tingali unya kuno kun baliwon mi.

Nagsinaaray na baya ming duha nga kami na gyod for ever, Tita. Unsa may angay namong buhaton? Palihog pasabta ko. Thank you.

* * *

Dearest Ms. Lonely,

Nalipay kaayo ko nga bisan panagsa ra ka makabasa sa maong column apan imo na nga na-appreciate ang akong trabaho. Makapadugang ka sa kadasig kanako aron akong ipadayon kining maong gimbuhaton. Ug nagdasig usab ako kanimo sa padala sa imong problema kun ugaling anaa ug nga sa imong tan-aw maglisod ka og sulbad niini.Tungod kay andam gyod ko og tagana nga moabi-abi sa inyong mga ipadalang problema. Maoy hinumdomi nga dili nako kini kayang buhaton kun wala kamo nga mopadala sa inyong suliran.

Ang inyong sitwasyon karon medyo lisod apan pilit gyod ninyong dawaton. Apan sa dili pa ninyo bulagon ang inyong tagsa-tagsa ka kasingkasing inyo unang subayon ang inyong pagka paryente. Asang dapita kamo nagka paryente kay basin diay duna pay kahigayonan nga puyde ninyong ipadayon ang inyong relasyon.

Angay ninyong masayran nga ang bag-ong gilatid karon sa atong balaod mahitungod sa kaminyoon mao nga first ug second degree dili gyod puyde kaslon o minyoon. Apan gikan sa third degree pataas puyde nang ipadayon ang relasyon kay matud sa atong bag-ong balaod ang third degree pataas puyde na kaslon.

Busa kun medyo layo na ang inyong pagka paryente ayaw namo pagproblema. Ang inyo lamang buhaton mao ang pag-convince sa inyong mga ginikanan tungod kay sila magsunod gyod gihapon kun unsay naandan. -- Tita Salie