Gugmang makalibog

Dear Tita Salie,

Maayong adlaw. Manghinaot ko nga kanunay kang malipayon sa imong kinabuhi ug anaa unta kanunay ang kadasig sa pagtabang kanamo nga dunay mga gihambin nga problema.

Tagoa lang ko sa ngalan nga Jie, 31 years of age. Dili pa minyo apan duna na ko’y duha kabuok anak sa duha ka lalaki sa akong kinabuhi.

Naglisod ug naglibog na gyod ko karon sa akong kinabuhi, Tita. Duha kabuok ang lalaki sa akong kinabuhi ug pareho silang dunay anak ngari nako. Ang una nakong gikarelasyon napriso man god  ug hangtud karon anaa pa siya sa sulod. Ug gibiyaan ako nga nag-alaga sa among anak hangtud nga akong gikaila agn usa ka lalaki ug  ako usab nga gikarelasyon.

Tungod lagi kay napriso man ang unang lalaki sa akong kinabuhi nakapatuyang gyod mi niining akong ikaduha ug nag live-in na lang kami hangtod nga nakabaton usab kami og anak.

Mahal kaayo nako ang duha, Tita. Ug mao kini ang akong gikalibgan karon kay pareho man silang may anak ngari nako.

Unsa may akong buhaton, Tita? Palihog pasabta ko. Thank you and more power.

* * *

Hello, Jie,

Mtud sa uban nga kausa ra gyod ta mahigugma sa tibuok natong kinabuhi, aduna say uban nga kadaghan, sa imong sitwasyon makalibog tungod kay kaduha ka mahigugma ug karon 2 gyod sila nga imong gihigugma. Hinuon medyo nawad-an ka og paglaom sa usa   tungod kay anaa man siya sulod sa selda. Apan unsaon na lang nimo kun moabot unya ang higayon nga makagawas na siya gikan sa prisohan ug iya kang pangitaon tungod kay nahigugma pa siya kanimo ug iyang masayran nga duna kanay lain nga gikauban?

Hinuon, sa duha ka lalaki nga imong gikalambigit nagpabilin lang gihapon kang gawasnon tungod kay wala pa man mo maminyo. Wala pay makagukod kanimo tungod kay bisan kun may anak na kamo apan wala pa kamo’y gipermahan nga kasabotan. Kun nahigugma ka man sa 2 ka lalaki, apan dili ko motuo nga pareho usab ang ilang estado diha sa imong kinabuhi. Busa kinahanglan ka gyod nga mopili kanila base sa ilang pagkabutang diha sa imong dughan.

Duna pa bay paglaom nga makagawas ang lalaki nga una nimong gihigugma? Kinsa man ang mas ikasinabot nimo pag-ayo?Kinsa kanila ang andam mounong kanimo ug labaw sa tanan kinsa ang dunay plano nga makigminyo kanimo.

Samtang tua pa sa selda ang usa ipahimutang na daan ang imong kinabuhi aron malikayan ang bug-at nga suliran. -- Tita Salie