Ka-alegre! Niining bag-o lang gipaningil ni Annabelle Rama, talent manager sa showbiz, ang iyang ig-agaw nga si Mayor Mike Rama bahin sa P3M nga gibubo niya tipon sa campaign fund sa Team Rama sa miaging piniliay. Iya kuno ning bawion kay napilde man siya. Wala kuno bantayi’g maayo sa mga watcher ang iyang mga boto, ang ila rang Mike ug Ed Labella ang gisiguro. Hinungdan, nga napilde si Annabelle. Puslan man, iyang bawion ang P3M. Pastilan, pagka guwatsinangga gyod!
Naigking intawon ang ig-agaw nga mayor, uy! Kulang man gani ang pundo sa City Hall alang sa mga proyekto nga nahunahunaan ni Mike, unsa na kaha ang iyang bulsa? Hugot namalibad ang mayor: “Wa ko’y ikabayad, uy! Ang unsay nagasto panahon sa kampanya, otomatik walay refund.â€
Bitaw. Ang eleksiyon sama sa sugal. Bisa’g pila pa ka milyon ang imong ipuhunan, di na garantiya nga segurado kang modaog. Dili man padaghanay sa kuwarta ang resulta sa piniliay. Padaghanay man sa mga botos. Busa, kun napilde man ta, aw ... di na gyod nato mabawi ang unsay atong gipuhunan.
Labi na dinhi sa Sugbo, wise voters na ang mga Sugbuanon. Kahibalo na sila manghimbis kinsa ang angay nilang pilion aron himoong lider. Kaantigo na silang maniid kinsa ang may nindot nang agi sa iyang pagpangalagad ug kinsa ang wala gyoy nahimo nga kaayohan? Kinsa ang mahigalaon sa tanang panahon ug si kinsa ang palaaway? Busa, makomparar gyod nila sa tapad.
Nan karon, nahitabo man nga ang nahimong kaparang ni Annabelle, si Kongresista Raul del Mar man, ang beteranong buotang politiko nga duol sa kasingkasing sa mga tawo, kinsa nahimong hinigugma halos sa tanan, kontra man o kaabin sa politika tungod sa iyang diyosnong kinaiya. Gani, kun sa natad sa pamoksing, si Floyd Mayweather Jr. wala makatilaw og pilde, samot na si Kong. Raul sa kalibotan sa politika. Mga tadhang politiko, hadlok makigparang ni Raul. Di nila kaya lukahon ang lig-ong kahoy nga nakagamot na pag-ayo sa dughan sa katawhan.
Gibantayan mag tarong sa mga watchers ang mga balota sa ilang ka masig ka kandidato. Si del Mar lang gyod ang gipili sa kadaghanan sa mga botante. Hinungdan, nga siya maoy midaog.
Kini nagpaila lang nga ang mga botante sa distrito diin molansar si Annabelle batok ni Raul, pulos na intilehenteng mamimiliay.