Gikang misimba, milahos si Mam Sefa sa merkado aron mangompra. Dihang may napili na siyang isda, mikuot siya’g kuwarta sa iyang bolsa aron kini bayran. Apan nakurat siya pagkakita sa solong papel de banko nga ning tungora gihikyad na sa iyang kamot.
“Uy, hala, nasayop diay ko sa paghulog ganina!†Tuaw sa iyang kahiladman human mahinumdom sa gisulod niyang tibuok papel didto sa collection bag panahon sa offertory sa misa.
Duruha ra ka papel de banko ang sulod sa bolsa ni Mam Sefa: usa ka P100 ug usa ka P1,000. Iyahang intensiyon nga mohalad og P100 sa simbahan samtang ang P1,000 maoy iyang ipangompra. Apan naunsa ba, nga nasipyat man siya sa pagpili? Ang P1,000 man hinuoy iyang nahulog ngadto sa sibot? Pastilan, Lunes ra ba ugma.Unsa na man lay iyang magamit para bawon sa iyang mga anak nga nagtungha? Layolayo pa ra ba ang ilang suweldo?
Gipaningot og buntag sayo si Mam Sefa sa pagpuga sa iyang utok unsay iyang buhaton? Hangtod nga nausa iyang hukom: kuhaon niya’g balik ang P1,000 nga iyang nahatag sa simbahan. Nagtuo siya nga mosabot ra ang Ginoo ning iyang desisyon.
Tuod man, giadto niya ang pari ug giistoryahan sa tanan. Gitawag sa pari ang sakristan ug nagpatabang ang alagad sa Diyos pagtsek-ap sa tanang collection bags kun aduna ba kini tibuok P1,000. Wala madugay, mitungha ang sakristan dala ang mga sibot. Sa atubangan ni Sefa, gihuho ang tanang sulod niini.
Miaringkil ang mga sensilyo nga gihuwad sa palanggana. Kasagaran, tagpiso, tagsingko pesos. Diyotay ra kaayong tibuok P20 ug tag P50. Wa gani tibuok P100. Apan dihang gihabwa ang sulod sa kataposang sibot, didto makit-i ang nag-inusarang usa ka libo ka pesos.
Namatud-an nga wa mamakak si Mam Sefa. Giuli sa pari ang P1,000. Gitunol sab sa maestra ang P100 nga mao gyod ang kantidad nga giandam niya alang sa offertory sa misa. Nag-sorry ug nagpasalamat si Mam Sefa sa kamasinaboton sa ilang kura paroko. Mibalik siya sa merkado nga nagsagol ang iyang gibati: kalipay ug kaulaw. Kalipay kay may P1,000 na siyang ikapalit sa mga inadlaw’ng panginahanglan. Ug kaulaw kay iyang gibawia’g P1,000 ang Ginoo.
Samtang ang pari nga nagsud-ong sa palanggana nga maoy gisudlan sa mga kuwartang halad sa misa, diin kadaghanan niini coins, sa hilom, nakapanglingolingo. Dinhi iyang nakita unsa ka pobre kining lungsod nga iyang gialagaran. Apan misabot siya sa mga tawo. Ning panahon ta karon nga ang balor sa peso, gaan na kaayo, unya ang mga palaliton misamot kamahal, kinsa bang tawhana ang maka-afford og P1,000 ngadto sa sibot sa simbahan? Lisod, uy! Bug-at ra tuod kaayo.
Ug masulob-on ang pari nga misulod sa iyang lawak sa kombento nga gabok na intawon ang mga bungbong ug salog nga hinimo lang sa mga baratohong kahoy. (Kataposan)