Hulog gikan sa langit

Gula 7

Wala gayud makasabot si Roel sa iyang gibati dihang miagi na tungod kaniya ang maanyag nga babaye. Diha niya masuta nga dili siya mao si Mariven apan magka-amgid gayud ang ilang panagway.

Paglabay sa singko minutos miagi na usab balik sa nahimutangan ni Roel ang babaye. Wala na niya makita ang panagway kay nagtalikud na, apan ang lawas niini susama gayud sa porma sa lawas kaniadto ni Mariven.

Wala kapugngi ni Roel ang paglad-ok sa iyang laway nga naghuna-huna kun unsa kalalim tagamtamon ang katam-is sa maong babaye kun iya kining maangkon.

Matag karon og unya pasiklapan gayud ni Roel ang babaye sa gawas. Ingon na usab niini ang gihimo sa babaye nga mopasiklap kini kang Roel kay nakabantay man nga gisigihan siya’g tutok sa ulitawo.

Unya nakita ni Roel nga mitawag og waiter ang babaye. Nasabtan niya nga aduna kini giorder. Taud-taud ang waiter mihatud na og usa ka baso nga fruit shake ug pipila ka makaon didto sa lamesa sa babaye.

Pagbalik og sulod sa waiter, gisinyasan ni Roel nga paduolon. “Bai, ang order anang babaye sa gawas diri lang iipon pag-charge nako, kaila nako na ang babaye. Pangutan-a didto kun wala na ba siya’y laing order,” giingnan ni Roel ang waiter.

Gibalik tuod sa waiter ang babaye. Gipasiklapan ni Roel ang babaye didto sa lamesa sa gawas. Mora’g misiga ang mata sa babaye ug nga daw nahibulong.

Milingi ang waiter sa sulod sa restaurant ug nakasabot si Roel nga nangutana ang babaye kinsa ang nagpapangutana kun aduna pa ba siya’y order. Mibiya ang waiter sa lamesa sa babaye nga nagpahiyom ug miduol pagbalik sa lamesa ni Roel.

“Sir salamat kuno kaayo apan wala kuno siya makahinumdom nga nagkaila mo,” matud sa waiter. Nakahuna-huna og paagi si Roel. “Pangutan-a bai kun pwede ba ko nga molingkod adto sa iyang lamesa,”gisugo ni Roel ang waiter dungan sa pagtunol og P50 isip iyang tip.

Tuod, misalir g’yud ang paagi ni Roel. Mibalik ang waiter nga mihimo’g thumbs up nga sinyas. “Oki kuno sir, maghuwat siya nimo.”

“Bayaran ko lang kining akong order bai ug kadtong order sa babaye,” ni Roel pa nga mihatag og tibuok usa ka libo ka pesos sa waiter.

Giduol dayon ni Roel ang babaye nga nagpahiyom kini nga mitutok kaniya. Wala g’yuy kalainan ang maong babaye kang Mariven nga girlfriend ni Roel kaniadto.

“Good evening, pwede ba nga makauban nimo’g lingkod?” giingnan ni Roel ang babaye. “Sure,” matud sa babaye nga nagpahiyom gihapon kang Roel. - Sumpayan