Nursing Student

Gula 6

Gituman ni Leo ang gisulti ni Beverly, nanaug siya gikan sa driver's seat sa kotse. Mibanos paglingkod si Beverly sa driver's seat aron mao na ang momaneho sa kotse paingon sa ilang balay nga nahimutang dili kaayo layo sa ilang nahimutangan.

"Sige, adto na ko Bebz," matud ni Leo ug siya pa ang misirado sa pultahan sa kotse. Apan mibukas ang bildo sa kotse. "Bye, Leo," gitunol ni Beverly ang iyang wala nga kamot ug dihang gigunitan kini ni Leo, iya kini nga gibitad.

Nakasabot si Leo kun unsa ang gusto nga mahitabo ni Beverly. Takulahaw lang nga nag-ukobay ang masig nila ka mga ngabil. "Sigi, ingat ka ha," matud ni Beverly dayong padagan sa kotse. Gisundan usab ni Leo sa paglantaw ang kotse ug mihunong kini tungod sa usa ka gate.

Nadungog ni Leo nga gipasirbato ni Beverly ang sakyanan. Taud-taud, mibukas ang pultahan og misulod ang kotse sa binuksan na nga gate. Wala gayud masayop si Leo, adunahan og pamilya sila si Beverly. Taud-taud human si Leo nauli sa iyang balay, buntag na.

Wala makareport sa trabaho si Leo kay gibati siya og tumang kakapoy nga walay tulog. Ingon usab diay si Beverly, wala makareport sa iyang trabaho sa ospital. Pagkahapon, nakadawat og text message si Leo gikan kang Beverly.

"Dili na unta ko mo-text pa nimo Leo kay mora'g mauwaw na ko nimo sa nahitabo," ni Beverly pa. Gipasabot ni Beverly nga nahadlok siya nga ipakaubos siya ni Leo tungod kay magtoo nga sayon ra siya nga pagka babaye.

Gipasabot ni Leo si Beverly nga wala siya'y angay'ng ikabalaka. Alang kang Leo nga nagkasinabot ang masi'g nila ka mga kasing-kasing. Wala makaagwanta si Beverly, mitawag gayud ni Leo sa iyang selpon.

"Magpasalamat lang ko nimo Leo nga atul nga wala ko sa maayong panimuot wala g'yud ko nimo binuangi. Kun lain pa nga lalaki tingali may nahitabo na kanako," matud ni Beverly. Gidapit ni Beverly si Leo nga mobisita sa ilang balay.

Nagduha-duha si Leo pagdawat sa pagdapit ni Beverly kay mauwaw siya nga adunahan kaayo sila apan wala magpabalibad ang dalaga. Apan nahuna-huna niya nga seryoso si Beverly sa iyang pagdapit.

Nag-ilis si Leo ug misakay paingon sa Lahug. Dali ra siya nga miabot sa duol sa gate sa Camp Lapulapu. Milakaw si Leo tungas sa karsada paingon sa balay nila ni Beverly. Iyang giteksan ang dalaga nga anaa na siya.

Gisugat siya ni Beverly sa gate. "Naa ba ang imong mga ginikanan Bebz," gisukna ni Leo si Beverly. - Sumpayan