Nursing Student

Gula 5

Klaro kaayo nga wala na sa maayo nga panimuot si Beverly kay gibitad na niya’g maayo si Leo aron iya kining magakus. Nagkuba-kuba ang dughan sa ulitawo.

“Ayaw Bebz kay tingali’g makasala ko nimo. Bisan og in-love ko nimo Bebz apan wala ka sa maayong panimuot pagka karon ug dili maayo nga magpahimulos ko sa higayon,” matud ni Leo.

“Leo, buotan ka man diay ug dili mapahimuslanon sa higayon,” may pagka yungit gihapon ang sinultihan ni Beverly.

Gihagkan ni Leo ang aping sa dalaga, apan wala siya makaagwanta, giukoban niya ang mga ngabil niini.” Daw nanghugot ang kaunoran ni Leo nga nakagakus ug nakahawok ni Beverly ilabi na nga lisud kaayo ang iyang kahimtang.

Mora’g malubag ang lawas ni Leo nga samtang naglingkud sa atubangan sa manobela sa kotse, naggakus ang wala nga kamot ngadto sa dalaga.

“Bebz, tana ihatud ko na ikaw sa inyo. Mag-estorya lang unya ta’g usab mahitungod sa akong gugma kanimo,” matud ni Leo. Wala na motubag si Beverly apan padayon kini nga naghapuhap sa bukton ni Leo.

Samtang nagdagan ang kotse paingon sa Salinas Drive, nakabantay si Leo nga nakatulog si Beverly. Duol na siya sa JY Square ug wala siya masultihi ni Beverly kun asa dapit ang ilang balay.

Nahinumdom si Leo nga giingnan siya ni Beverly kaganina nga duol sa ganghaan sa Camp Lapulapu ang ilang balay. Gihunong ni Leo ang kotse dihang misulod na siya sa karsada paingon sa gate sa kampo.

“Bebz, bebz, dia na ta sa Salinas Drive... pagmata na,” hinay’ng tingog ni Leo dungan sa pagpikpik sa abaga sa dalaga. Apan wala gayud mahigmata si Beverly.

Bisan og tinted ang bildo sa sakyanan apan tungod sa kahayag sa suga gikan sa poste, naaninaw niya ang panagway ni Beverly. Gitutokan ni Leo ang madanihon kaayo nga mga ngabil sa dalaga nga iyang giukoban kaganina.

Daw nadala gayud si Leo sa iyang kahigwaos. Anam-anam niya nga gipaduol ang iyang mga ngabil sa ngabil ni Beverly. Sa ikaduha nga higayon giukoban ni Leo ang lumoy kaayo nga mga ngabil sa dalaga.

Diha pa nga nahigmata si Beverly. “Leo, Leo, asa na man ta dapit?” matud ni Beverly nga mora’g nahuwas-huwasan  na’g gamay.

“Dia na ta sa karsada duol sa gate sa kampo, asa ba dapit ang inyong balay?” gisukna ni Leo si Beverly. Milingi-lingi si Beverly nga mora’g gialingawan pa.

“Sa unahan ang among balay. Ako na la’y drive paingon didto kay makaya na man nako Leo. Uli na lang ug mag-estorya lang ta ugma,” ni Beverly pa.- Sumpayan