Nagkumustahay makadiyot sila si Jerson ug Karlyn. “Mangayo lang ko sa bag-o nimo nga contact numbers Karlyn kay duna ka ra ba’y kauban,†giingnan ni Jerson ang gikamingawan niya nga amiga.
Mibalik si Karlyn sa lamesa nga gibutangan sa iyang bag ug gikuha ang iyamg selpon. Iya kining gipindot-pindot ug dayon mibalik siya sa nahimutangan ni Jerson. Gipakita niya kang Jerson ang iyang contact numbers.
Abtik kaayo kini nga gikopya ni Jerson ug gi-encode sa iyang selpon. “Sigi Karl, balika na ang imong kauban kay tingali’g malain siya nga dia ka nako nakig-estorya,†giingnan ni Jerson si Karlyn samtang gipasiklapan niya ang lalaki nga kauban sa dalaga.
Sa tan-aw ni Jerson mora’g klaro kaayo nga naglagot kini kaniya kay iso’g kaayo’g tinan-awan. Gitagad kini ni Jerson pinaagi sa pag-isa sa iyang tuo nga kamot apan wala gani motagad kaniya ang lalaki nga isog kaayo’g tinan-awan.
Wala madugay mitindog gikan sa ilang gilingkoran sila si Karlyn ug ang kauban niyang lalaki. “Bye, Jerson, text lang unya ta,†matud ni Karlyn nga mitimbaya sa dayon na niini og gawas sa canteen, apan ang lalaki nga kauban ni Karlyn misiyok ang tinan-awan kang Jerson.
Mora’g gilainan kaayo si Jerson nga naghuna-huna. Gikulbaan siya kay tingali og gikasuko pag-ayo sa lalaki nga gitagad siya ni Karlyn. Diha sa huna-huna ni Jerson ang pangutana kun boyfriend ba kaha ni Karlyn ang maong lalaki.
Mipauli si Jerson sa giabtan niya nga apartment nga inspirado kaayo tungod kay gikakita niya si Karlyn. Apan usahay lang usab mokalit pagsakdap sa iyang kaisipan ang panagway niadtong lalaki nga isog kaayo’g tinan-awan kaniya.
Nakahuna-huna si Jerson nga iyang teksan si Karlyn. “Hi Karl, gud pm. Miss u so much. Boyfriend nimo kadtong kauban mo ganina?†Gusto nga masayod si Jerson kun kinsa kadtong lalaki kay basin og masuko kini kun mopaduol siya kang Karlyn.
Taud-taud nakadawat siya’g reply ni Karlyn. “Di uy, classmate ra to nako pero mora’g naka like tingali.†Nagbayloay og mga text message sila si Jerson ug Karlyn. Nagsuginlanay sila sa ilang mga kaagi atul sa bakasyon.
Nawala diay ang selpon ni Karlyn mao nga wala na kini makontak pa ni Jerson ug wala usab masayud ang dalaga sa iyang numero.
Giimbitar ni Jerson si Karlyn nga magdungan sila’g paniudto pagkaugma adto sa canteen. Wala mobalibad ang dalaga. Pagkaugma, nag-una si Jerson sa canteen aron makakuha siya daan og bakante nga lamesa.
Wala tuod madugay diha na si Karlyn apan nakurat si Jerson kay kauban niini kadtong lalaki nga classmate niini. Mideritso si Karlyn pagduol sa lamesa ni Jerson. - Sumpayan