Dear Tita Salie,
Have a wonderful day. Just call me Gracy, usa ka dalaga apan dunay anak 2 na ka bulan.
Aduna ko’y hinigugma karon nga naluoy kaayo ko niya. Ang akong kaluoy kaniya maoy nakahasol kanako pag-ayo.
Seryosohon siya nga pagkatawo ug buotan pa gyod kaayo. Nasayod gyod ko nga tinuoray ang iyang gugma ngari kanako. Apan dihang nanguyab siya nako, Tita, wala gyod siya masayod nga may sulod na ang akong tiyan. Mabdos nako dihang ako gidawat ang iyang gugma. Mabdos ko apan dili siya ang amahan nga anaa sa akong tiyan, kay sukad masukad wala man gyod siya makahilabot kanako.,
Aron paglilong sa akong gidangatan milarga ko sa laing lugar. Wala gyod masayod ang akong uyab sa tinuoray. Gibuhat ko usab kini kay nahadlok usab ko nga masayran sa akong mga ginikanan ang akong gidangatan.
Hangtud karon nagpaabot lang gihapon ang akong uyab kanako. Magsige siya og text kun kanus-a kami magkita pag-usab wala gyod siya masayod nga may baby na ako, kay wala man gyod siya’y kalibotan nga nabuntis ko.
Karon naglibog ko, Tita, kun unsaon nako kini. Ako ba siyang sultian sa matuod nga nahitabo kanako? Palihog pasabta ko sa angay nakong buhaton. Thank you very much and more power.
* * *
Hello, Gracy.
Sa sunod, imo gyong hunahunaon pag-ayo ang butang nga gusto nimong buhaton aron wala kay kahadlokan nga moatubang sa sangputanan sa imong binuhatan. Be strong to face the consequences sa tanan nimong mga action aron dili ka dapat motago kay lisod ug pait ang kinabuhi kun kita dili gawasnon tungod kay duna kita’y nabuhat nga dili maayo sa dili ka pa mohimo og action sa imong nahunahunaan nga buhaton imo unang tan-awon kun imo bang ikalipay ang mamahimong resulta niini, kun dili ba kini makahimo og dakong kadaot sa imong kinabuhi kay kun kini makadaot kanimo dili gyod kini sakto ug dili gyod malipay niini ang Diyos.
Busa, gawas na diha sa imong gitagoan ug atubanga ang kamatuoran. Adtoa ang imong pamilya ug pahibaw-a sila sa tinuod nimong gidangatan. Pangayo og pasaylo kay nakasala ka man kanila.
Human ka maka-reconcile sa imong pamilya, usa ka pa mopahibalo ngadto sa imong uyab mahitungod sa tinuoray nimong kahimtang. Andama ang imong kaugalingon sa pagdawat sa tanan nilang reaction human nila mahibaw-an ang tanan. -- Tita Salie