Birthday Gift Gula 7

Wala gayud magdahum si Lynlyn nga ang lalaki nga bag-ohay pa lang nahimo niya nga boyfriend mao diay ang anak sa tag-iya sa kompaniya nga gitrabahoan sa iyang amahan.

“Ayaw usba ang imong pagtan-aw kanako Lyn, imo na baya ko nga boyfriend ug ako ka na ‘sab nga girlfriend. Wala’y labot sa atong gugma ang isyu nga ang akong amahan maoy tag-iya sa kompaniya nga gitrabahoan sa imong Papa,” pasabot ni Artemio sa dalaga.

Mingaw na ang palibot apan makita gihapon sila sa kayda kun adunay mga tawo nga maglantaw lang sa halayo. Gusto unta ni Artemio nga mohawok kang Lynlyn apan nagpanagana siya nga adunay makakita kanila.

“Ayaw kahadlok kanako Lyn, buhing saksi ang imong amahan nga dili ko dautang tawo. Gani suod kaayo kami nga managhigala ang imong amahan bisan og managlagyo ang among edad ug nga ako maoy ilang operations manager,” pasabot ni Artemio kang Lynlyn.

Giagbayan ni Artemio si Lynlyn ug aduna siya’y gihunghong sa dalaga. “Ayaw dinhi sa beranda kay mabarato ko ana sa panan-aw sa mga makakita,” matud ni Lynlyn dihang mihangyo si Artemio sa dalaga nga iya kining hagkan.

“Tana, adto ta sa sala manglingkod,” ni Lynlyn pa. May pagka- ngiob ug dyutay didto sa sala. Nagtupad sila paglingkod sa sopa. Wala maglangan si Artemio. Human niya masuta nga walay nagtan-aw kanila, gigakus niya si Lynlyn ug gihagkan.

Tam-is kaayo ang mga ngabil sa dalaga nga daw gitupsan ni Artemio sa makabuhong nga pagmahal. “I love you Lyn,” ni Artemio pa nga pwerteng nakagakus sa dalaga. “I love you too manager,” matud ni Lynlyn nga nagpahiyom. Nagkinataw-anay silang duha.

Gitug-anan ni Artemio si Lynlyn nga wala gayud siya magdahum nga si Berto nga ilang utility personnel sa kompaniya mao diay ang amahan sa dalaga. “Dili na ako maglisod pagtug-an ni Papa nimo nga ikaw maoy akong pangasaw-on kay gisulti ko na kini kaniya kaganinang udto,” matud ni Artemio.

Dali ra kaayo ang pagkilab sa mga oras. Ala una na sa kaadlawon ug atol nga nahigmata si Berto nga miadto sa pansayan. “Dia ka pa diay Sir? Tambag nako Sir, dinhi ka na lang matulog kay basin og makorsonadahan ka pa unya diha sa gawas, peligro na,” ni Berto pa.

“Pwede ra ‘sab kana kun modason paghawid ang akong pangasaw-onon Nong Bert,” sagol komedya ni Artemio. Giluknit ni Lynlyn ang iyang kilid. “Sige uy, dinhi ka na lang matulog Bert kay basin bitaw og makorsonadahan ka diha sa mga standby,” dason ni Lynlyn.

“Tumanon nako ang giingon nako nimo Nong Bert pangasaw-on nako ang babaye nga akong naibgan.. ug wala ko magdahum nga imo diay kini nga anak,” ni Artemio pa. Nagkataw-anay silang tulo. - Kataposan