Birthday gift

Daku kaayo ang kahibulong ni Artemio kay nakadawat og text message ang iyang selpon gikan sa AutoLoadMax nga nagpahibalo nga adunay P500 nga prepaid credits nga gi-load sa iyang numero.

Nahibulong si Artemio kay bag-o man siya nga nag-load og P500 nga suplay gikan sa ilang opisina. Daku ang pagtoo ni Artemio ng adunay nasipyat sa pag-load mao nga nagpaabot siya nga aduna g’yuy mokontak kaniya.

Wala gayud masayop si Artemio kay duha ka oras ang milabay dunay babaye nga mitawag kaniya. Nagpakilooy kini nga ibalik pagpadala ang load nga nasipyat sa pag-send. Iyang nahibaw-an nga ang babaye kawani sa usa ka tindahan.

Dili ra layo sa opisina ni Artemio ang gitrabahoan sa babaye nga nagpaila nga Lynlyn. Misugot si Lynlyn nga magkita usa sila si Artemio sa dili pa iuli aron sutaon kun tinuod ba nga siya ang nag-send.

Nakit-an dayon ni Artemio ang tindahan nga gitrabahoan ni Lynlyn. Duna g’yud tuo’y gamay’ng booth nga para sa cellphone load. Nagpasumangil si Artemio nga magpa-load.

“Tinuod ba nga barato ra ang inyong load dinhi miss? May kaila man gud ko nga mi-refer dinhi ug ipapangita lang kuno si Lynlyn. Kinsa si Lynlyn  miss?” matud ni Artemio.

“Ako si Lynlyn, kinsay nag-ingon nga barato ra ang among load? Pareho ra man sa uban,” matud ni Lynlyn. Diha pa nga nagpaila si Artemio nga siya ang nakadawat sa P500 nga AutoLoadMax nga nasayup sa pag-send.

“Aw ikaw diay? Please bi ari na lang i-send sa akong number,” matud ni Lynlyn. Human ika-phonebook ni Artemio ang numero ni Lynlyn, mikuot siya sa iyang pitaka.

“Bayaran na lang bitaw nako ang P500 nga na-send nimo kaganina Lyn para dili ka na maproblema. Ang mahinungdanon nga amiga na ta,” matud ni Artemio.

Gikan niadto, kanunay gayud nga si Artemio mohapit sa tindahan nga gitrabahoan ni Lynlyn kun mosuroy siya sa downtown. Usa ka adlaw, gikomedyahan si Artemio sa usa ka kauban sa trabaho ni Lynlyn.

“Makahatag ka gayud og gift ni Lynlyn ugma Art kay birthday man niya,” matud sa amiga ni Lynlyn.

“Wala g’yuy problema. Unsay gusto nimo nga akong ihatag nimo nga gift Lyn?” giingnan dayon ni Artemio si Lynlyn. Igo lang mikatawa si Lynlyn ug diha pa makabantay si Artemio nga kandiison diay ang dalaga.

Apan may misantup sa huna-huna ni Art. “Ah oki, may nahuna-hunaan na ko nga ihatag ni Lynlyn ug sigurado ko nga malipay siya sa akong gift.” (Sumpayan)