Matinabangon Gula 7

“Ikaw Lit, I’m sure nga duna ka g’yuy girlfriend o kaha minyo na gani tingali,” giingnan ni Gemma si Lito samtang iya kining gitutokan.

“Mora’g susama sa imong sitwasyon Gem, mohapit na usab tulo ka buwan nga wala ko’y girlfriend kay nagkabuwag ‘sab mi. Ang akong girlfriend may batasan nga mokalit lang paglakaw unya dili makontak,” ni Lito pa.

Nagtinutokay sila si Lito ug Gemma. Mora’g nagsultihanay ang ilang mga mata. “Kun dili pa ko mauwaw nimo Gem kay adunahan ang inyong pamilya, manguyab g’yud unta ko nimo,” matud ni Lito.

“For me, there’s no rich or poor if two people really love with each other,” ni Gemma pa nga paraygon kaayo’g tinutokan kang Lito. Nakahatag kini og kadasig ni Lito nga panguyaban si Gemma bahala na og anak kini’g adunahan.

“Bitaw, dili na lang g’yud ko magliko-liko pa Gem, I love you,” matud ni Lito dungan sa paggunit niya sa kamot sa dalaga. Nakapahiyom si Gemma nga nakadungog. “Daan pa lagi ko nga imo lang kataw-an kun manguyab ko nimo, unsaon pobre man gud tawon ko,” ni Lito pa nga nagpanglingo-lingo ug miduko.

Nagpahiyom gihapon si Gemma ug abtik kaayo nga mipig-it sa kamot ni Lito. “Dili uy, dili uy, wala ko magkatawa nga naka look down ko nimo Lit, nagkatawa ko kay pwerte nimo nga paspasa nga nanguyab,” matud ni Gemma.

Wala na lang ‘sab kapugngi ni Lito nga nakapahiyom. “Kuan man gud Gem, gisakyan na lang nako ang panahon kay higayon man kaayo nga I can tell you my feelings.”

Nakita nila nga nanindog na ang mga bisita ni Mr. Sim nga pulos ‘sab mga Insik. Dihang nakabiya na sila, miduol si Mr. Sim sa nahimutangan nila ni Lito ug Gemma. “ Mora’g seryos kaayo mo’ng duha da,” nangomedya pa ang amahan.

Nakasabot si Mr. Sim nga mora’g labaw pa sa maghigalaay ang pagtinagdanay nila ni Lito ug sa iyang anak. Nagpahiyom siya nga mitutok sa duha. “Sugod ugma, i-promote ka na ni Mr. Lu sa imong katungdanan kay ako nga giingnan si kumpare nga buotan ka.”

Nakalitan si Lito sa gipahibalo ni Mr. Sim. “Kabuotan nimo sir, daku kaayo ko’g utang kabubut-on nimo. Kanindot kun mahimo ka nako nga amahan,” wala makapugong si Lito pagpadayag sa iyang gibati.

“Kun magkasabot mo’ng duha, mahimo ko na ikaw nga anak ug ako imong amahan,” matud ni Mr. Sim nga nagpahiyom. Nakapahiyom na lang ‘sab sila si Gemma ug Lito. Wala tuyoa nga nakagakus si Gemma kang Lito bisan og nagtan-aw kanila ang iyang amahan. - Kataposan