Libro

Sekyu si Randy sa Ecstacy Department Store. Wa pay tuig. Unya nakoryoso siya mahitungod sa usa ka customer nga lalaki. Hapit katulo sa usa ka semana mosulod ang maong hamtong lalaki sa department store. Usahay magdala og kinompra. Usahay walay madala. Apan ang kanunay gyud niyang dala sulod ug gawas, usa o duha ka libro. Segurado nga magbasa gyud siya didto sulod sa department store o kun asa man siya mag-estambay didto aron palabay sa panahon.

Unom ka bulan na ang tawo nga magsulod guwa sa department store. Natiman-an na niya. Ug dili na lang niya kapkapan. Kay tiguwang na ang tawo. Mga saysintahon na og hitsura. Wa seguroy terrorist nga ingon ini og edad. Apan nakahukom siya nga pakig-estoryahan niya ang tawo sunod higayon nga mosulod.

“Sir, nganong magdala man ka’g libro kada-sulod nimo sa mall?” sukot ni Randy usa ka hapon nga nisulod ang tawo.

“Habit na gyud ni nako Dong nga magdala og basahon, bisan asa ko punta. Dili man hinuon nga magbasa ko tanang higayon. Kana, kun wa na gyu’y laing mabuhat, magbasa ko. Palabay sa oras. Kun dunay huwaton. Apan kun duna koy makahinabi, di ko magbasa” sa tawo nga nisaylo ug naglingi ni Randy paghuman og hikap sa kilid ug bukobuko. Nihunong ug niliso aron atubangan si Randy.

“Kinsa man diay imong huwaton dinhi sa sulod?” ni Randy. Nakalugar og pakighinabi kay wa pay laing tawo nisulod sa main door sa mall.

“Akong misis ug anak dalaga nga nangumpra. Ako may drayber nila. Tua na sila sa grocery section. Nag-una nako. Unya maghuwat na lang ko’g mahuman sila’g pangumpra. Samtang maghuwat, maoy akong ibasabasa” sa tawo.

“Kun pananglitan, di ka kadala og libro? Unsa may imong buhaton?” ni Randy.

“Pagkatinuod, kun wa koy mabasa, unya maglingkod lang kong magpalabay sa oras, unya way ka estorya, mora ko’g mabuang. Makahunahuna ko’g huramentado!” Sa tawo. Seryoso.

“Kuyawa gud diay, Sir. Kun mao na, bantayan ta gyud ka sunod higayon. Magpalit lang ko’g libro para ipahuwam nimo, kun wa kay dalang libro. Aron di maglain imong ulo”, ni Randy. Nagpahiyom.

“Bitaw! Ayg kabalaka, Dong. Kay kun wa ko’y dalang libro, naa may bargain books sa mall. Magpalit lang gyud ko. Kun dili, pahuwama lang unya ko’g libro”, sa tawo. Nipahiyom.

“Ok Sir. Approved. Pahuwamon tika gyud og libro. Aron lang di ka maghuramentado”, ni Randy. Nag-apir sila. Ug nipadayon ang tawo sa sulod. Kay nabisi na si Randy og pangapkap sa mga nagpusot-pusot og sulod nga mga dumoduong sa mall.

Sa pagkatinuod, si Randy ang gustong mohuwam og libro sa tawo. Duna siya’y nakit-an nga libro nga makapadani ang ulohan. Gitiman-an niya. Human seguro og basa sa tawo. Kay wa na man dad-a. Ug sa sunod higayong magkahinabi sila, hisgutan niya ang tawo sa libro. Ug makig-book exchange siya. (Kataposan)