Gibugtian ko’g kinabuhi

Sayo sa kabuntagon naghinuktok si Berto nga naghunahuna sa iyang amahan nga si Rimundo tungod kay dako kining masakiton. Sanglit  kay amahan man mobati gayod og kabalaka si Berto. Gibuhat gyud niya ang tanan kutob sa iyang mahimo aron lang matabangan ang iyang pinalanggang amahan pinaagi sa iyang paningkamot nga makakuwarta sa pagpanagat.

“Papa Rimundo, unsa man dad-on tika sa hospital?” pangutana ni Berto nga mabalak-on.

“Dong Berto ayaw na lang kay wala kay kuwarta nga ikagasto sa hospital,” ni Rimundo nga naguol.

Puwerting bakho sa paghilak ni Berto tungod kay dili siya gustong mawala ang iyang pinalanggang amahan. Mora’g gidat-ogan sa kalibutan si Berto sa pagkasayod sa iyang Papa Rimundo nga may kanse sa atay. Ang iyang mama Isabel mao ra ang nagbantay sa iyang amahan. Ug ang tanang tinigom nga kuwarta ni Berto sa pagpanagat nahurot na gayod kay gigasto sa pagpalit og tambal sa iyang amahan  ug kini kulang pa.

“Mama Isabel paresita sa doktor kay ako ang bahala sa tanan,” pahayag ni Berto.

“Dong Berto, unsa ang imong buhaton nga wala man tay kuwarta nga ikapalit og tambal sa imong amahan,” tubag ni Isabel nga mabalak-on.

Sa dihang nahatag na ang resita sa iyang mama Isabel nilakaw kini si Berto padulong sa botika ug sa paghatag gayod sa tindera sa tambal nidagan kini padulong sa ilaha ug naningkamot taman sa ginhawa nga dili madakpan sa naggukod kaniya aron adunay ikadapat nga tambal sa masakiton niyang amahan. Ug nasiplatan siya sa mga polis ug wala mohunong sa pagdagan hangtod nga naigo sa bala si Berto.

“Mama Isabel, ihatag ni Papa Rimundo ang tambal dawata, maayo na siya niana,” matud ni Berto nga nagkadugo.

“Dong Berto, nganong nagkadugo man intawon ka. Naa pay imong amahan masakiton inyo ba kong talikdan?” ni Isabel nga nibakho sa paghilak.

“Day Isabel, dad-a ang atong anak si Berto sa hospital kay nagkadugo siya,” sagbat ni Rimundo.

“Pa, M-a, a-y-aw....w-a-l-a -n-a-y- k-a-p-u-s-l-a-n-a-n- k-a-y-m-a-m-a-t-a-y-n-a-k-o-k-a-y- k-a-n-a-n-g-t-a-m-b-a-l-n-g-a i-h-a-t-a-g-k-o-n-i-p-a-pa- R-i-m-u-n-d-o-g-i-b-u-g-t-i-a-n-k-o-’g- k-i-n-a-b-u-h-i”, matud ni Berto nga dayong bugto sa iyang gininhawa. (Kataposan)