Pambata Litiklitik

Nahalingi si Bimbo sa misangpit kaniya sa eskina nga haduol na sa ilang eskuylahang elementarya sa ilang baryo. Maoy nasugat sa iyang panan-aw si Andro nga nagbitbit sa kinadena niyang daghang lastiko ning buntaga. Klasmeyt niya si Andro sa Grade Four Section One.

“Mo-eskuyla pa ko, Bay Dro! Di diay ka mosulod sa klase ning buntaga?”

“Kapoy og eskuyla, Bay Bim! Absent ko ron. Makiglitiklitik ko ron dinhi sa eskina. Maghuwat ko’s katalirungan kong mga batang estambay nga duna say daghang lastiko.

“Daghana nimo’g lastiko, Bay Dro, uy...!”

Dinaog ko ni gahapon, Bay Bim...!”

Gipasiklapan ni Bimbo ang kinadenang daghang lastiko ni Andro. Hilig sab siya’g litiklitik og lastiko. Nauso kining dulaa dinhi sa eskina sa mga bata, ilabi na sa adlaw’ng Sabado ug Domingo nga way klase ang elementaryang eskuylahan. Apan dili parehas si Bimbo kang Andro nga mopalta la’g eskuyla tungod sa litiklitik.

“Sayo pa bitaw sa buntag, Bay Bim! Litiklitik una ta...!”

“Wa man koy lastiko, Bay Dro...!”

“Aw, pwede man nga mopalit ka nako’g lastiko aron maglitiklitik ta! Naa man kaha kay bawon nga diyes pesos...!”

Nahiunlod si Bimbo sa paghunahuna. Sa tinuod lang, aduna siya’y bawon nga bayente pesos matag adlaw nga ihatag sa iyang Papa ug Mama, aron ipalit niya’g makaon sa matag panahon sa recess sa eskuylahan, way labot sa balon niyang kan-on ug sud-an sa iyang lunchbox nga gisulod sa iyang school bag.

Unya, may laing duha ka estambay nga mga bata nga miabot sa eskina nga nagdala usab og daghang kinadenang lastiko nga mitimbaya dayon kang Andro.

“Litiklitik ta, Bay! Tagsingkwenta ka lastiko kada bugkos...!” matud sa usa ka bata ngadto kang Andro nga nagpagarbo sab sa kinadena niyang lastiko.

“Sige, litiklitik ta...!” ni Andro nga mihikyad dayon sa iyang lastiko.

Nakaginhawa og luag si Bimbo nga abtik milakaw padulong sa eskuylahan. Hilom siya nga nagpasalamat sa kaugalingon nga wala gayud matental ni Andro sa litiklitik, aron dili niya magasto ang bawon niyang kuwarta ug aron dili sab siya ma-late sa pagsulod sa klase niadtong buntaga. (Kataposan)