Dear Professor Tata Swami,
Nalipay kaayo ko’g dako nga nabalik na sad ka og pagpanghubad og mga damgo. Sa panahon pa sa imong papa, ang among tibuok banay nga mag-atang gyud kanunay. Nang-ingon nako sa akong nga kabanay nga tua sa lagyong dapit nga nabalik naka, sama sa mga taga Negros ug Bohol.
Prof, nagdamgo man ko nga ang akong bana nagduwa man og bitin nga plastic, kana bang duwaan nga bitin-bitin pero mura gyud og tinuod. Nakakita man gud siya og iring nga ni agi sa among tungod nga nagtan-aw og t.v. maong nagkuha siya atong bitin nga plastic aron iyang hadlukon ang maong iring. Nikaratil og dagan ang iring Prof, ug pwerteng katawaa sa akong bana pero wa siya kabantay nga nikalit man og lihok ang bitin ug nahimong tinuod, dili na duwaan. Nisaka kuno ko sa among table nga kan-anan sa akong kahadlok. Mao ra to Prof.
Manghinaut ko nga imo ning matubag kay dili gyud ko mahimutang Prof. ay! Salamat ug more power nimo ug sa Banat News! Ang imong suki. — Angel
Angel,
Mangutana ko, mabdos ka? Kay kung mabdos man gani ka, imong damgo nagpasabot nga imo gyud nang ampingan nga dili ka makuhaan, kay kuyaw kaayo nga mangita og lain imong mister kung mahitabo man gani nga mawagtang ang imong gisabak.
Pastilan pud ni imong bana uy, luoran man kaayo! Basin og naghinam-hinam lang gyud ni siya sa inyong umaabot nga anak, maong mahugno gyud iyang kalibutan kung simbako makuhaan ka. Busa mag-amping gyud ka kanunay ug pangita gyud og paagi nga makapahuway ka ug ayaw kalimot sa imong mga vitamins.
Salamat pud kaayo ug sa imong tibuok banay nga nagsunod kanunay sa pagpanghubad sa damgo, sukad pa sa among amahan, si Amading Abad. Kung pagbuot sa Ginoo ning tanan, magpadayon gyud ang atong pagpanghubad kay Siya man gyud ang atong gipangayoan og tubag ning tanan ug aron giyahan ta nga masanta ang dili maayong umaabot nga mga panghitabo. — Prof. Tata Swami
Atangi ang Hubad sa Damgo matag Miyerkules ug Sabado dinhi lamang sa Banat News. Alang sa inyong pangutana kabahin sa kahulogan sa inyong damgo, ipadala lang ni Tata pinaagi sa: beyonddreams2112@yahoo.com.