Ang kasugiran sa gubat sa Maktan

Nakapanglingkod na usab ang tanang mga bata sa atubangan ni Lolo Baresto ug  mahinamon na kaayong maminaw sa kasiguran sa panag-engkuwentro nila ni Lapulapu sa isla sa Maktan batok sa langyaw nga mga Katsila nga gipangulohan ni Ferdinand Magellan.

“Unsa man,” ni Lolo Baresto pa nga naglingkod gihapon sa silyang tuwang-tuwang nga ginama sa kawayan. “Andam  na kamo alang sa kasiguran sa gubat sa Maktan niadtong Abril 27, 1521.?”

“Andam na mi, Lo,” nagdungan sa pagtubag ang mga bata. “Gusto na mi nga mahibawo kun nganong nahitabo man ang gubat sa daplin sa baybayon sa isla sa Maktan?”

“Na hala,” ni Lolo Baresto  pa. “Malinawon ang isla sa Maktan kaniadto ubos sa pagpangulo ni Datu Lapulapu nga naminyo kang Rayna Bulakna. “Apan bisan kun malinawon kini apan sa gihapon iyang gidasig ang tanang kalalakin-an sa pagbansay  sa ilang kaugalingon sa pagpakig-away. Sa pagpangandam kanunay batok sa mga pundok gikan sa laing tribu nga nagtinguha sa pag-ilog sa isla sa Maktan nga ilang gipuy-an.”

“Unya,” mipadayon sa pagsugid si Lolo Baresto. Usa ka buntag niana ilang nakita ang sakyanan sa kadagatan nga giluwanan sa gatusan ka mga tawo nga milabay sa isla sa Maktan.”

“Naukay ang mga molupyo sa maong isla tungod kay nakita man nila nga dili ordinaryong sakyanan sa kadagatan ang ilang nakita,” dugang pa ni Lolo Baresto.“Gimandoan  gilayon ni Lapulapu ang duha niya ka mga sakop sa pagluwan og sakayan ug sundon kun asa padulong ang maong barko nga milabay sa isla sa Maktan,”

“Kilom-kilom na nga nahibalik ang duha ka sakop ni Lapulapu ug miasoy nga mga langyaw nga Katsila ang sakay sa maong barko nga midunggo sa Sugbo ug  giabiabi kini ni Raja Humabon ug Rayna Juana ug gibunyagan ang tanan sa relihiyon nga Romano Katoliko.”ni Lolo Baresto pa.

“Ug tuod man,” mipadayon si Lolo Baresto sa iyang kasugiran. “Sayo pa sa buntag nga nahidangat sa isla sa Maktan ang mensahero nga gipadala ni Raja Humabon sa Sugbo nga nagpahibalo labot sa pagbisita ni Magellan alang sa pagbunyag usab kanila sa gidala niining relihiyon.”

“Misinta sa kasuko si Lapulapu ug kusganon kining misupak sa tinguha ni Magellan nga pagbunyag kanila sa gidala niining relihiyon nga maoy nahimong pabilo sa gubat sa Maktan,” nagkanayon si Lolo      Baresto.

“Nahitabo gayod ang gubat sa Maktan,” ni Lolo Baresto pa. “Gikanyonaso ni Magellan ang isla sa Maktan sayo sa buntag nga nakapakurog sa tibuok niadtong adlawa.”

“Nakig-away sila si Lapulapu  ug ang ilang kahanas sa paggamit sa bangkaw, pana ug sundang daw nakapakurog usab sa kalisang sa mga langyaw nilang kaaway.’’

“Bantugan nga manggugubat sa Espanya si  Magellan gawas nga hanas usab sa pagpakig-away nga naggamit og espada ug taming,”ni Lolo Baresto pa. “Dili usab madutlan sa pagtibas ni Lapulapu tungod sa gisul-ob niining sapot nga puthaw.

“Apan abtik ug utokan si Lapulapu,” nagkanayon si  Lolo Baresto. “maoy iyang gisentro sa pagtigbas ang tuhod ni Magellan ug napaluhod kini dihang nasamad ug gisundan pa sa makadaghan hinungdan sa pagkahagba sa dagat nga taga tuhod ang gilawomon ug namatay. (Katapusan)