Gula 35
Si Marcos diay. Nangumosta kun maayo ba ang akong pagkatulog sa milabay nga gabii. Mi-reply ko sa iyang text. Giingnan ko siya nga nahinanok ko og maayo.
Mitingog pag-usab ang akong cellphone. Si Marcos gihapon ang nag-text. Gusto siyang makigkita nako inigkahapon. Duna kuno kami importanteng panagsultihan. Pero nakasabot na ko nga lansis lang kadtong iyaha. Mao nga gibalibaran ko siya. Gitubag ko siya nga dili ko makalakaw karong adlawa kay aduna koy exam. Ugma.
Wala na mo-reply si Marcos sa akong text kaniya. Nagtuo ko nga okey ra para niya ang akong pagbalibad sa iyang gusto nga magkita kami. Wala na lang sab ko mo-text pag-usab niya. Nagdali-dali ko pagsul-ob sa akong uniform kay hapit na ang oras sa akong klase. Tingalig ma-late ko sa unang klase nako sa buntag, ug wala na koy computer nga magamit.
Hapit gyud ko ma-late sa una nakong klase. Menus singko na sa akong pagsulod sa main lobby sa University nga akong gitunghaan. Sagol dagan ang akong linaktan paingon sa classroom nga nahimutang sa 3rd floor sa tulonghaan. Naghangos ko sa kakutas nga misulod sa classroom. Nakapasalamat ko sa hilom nga wala pa usab diay mahiabot ang among maestro. Na-traffic tingali.
Human sa akong klase sa ikaduha nakong subject sa buntag misulod ko sa canteen sa school aron mag-snack. May vacant ako nga one hour una pa ang akong sunod nga klase. -- Sumpayan pa