Probinsyana

Sabado kadto sa hapon.Talisawop na ang adlaw ug paspas ang paglakaw ni Renante tungas niadtong dalan-dalan nga gitudlo kaniya sa tawo didto sa unahan nga maoy iyang subayon.

Karon pa siya makaanhi sa Catmon kay giimbitar sa iyang higala nga si Rico, nagpuyo sa usa sa mga barangay dapit sa bukid nga gitawag og Cabunga-an.

Giingnan ra man gud si Renante ni Rico nga adto manaug sa Catmon-Daan ug motungas subay sa karsada. Ilado lagi kuno si Rico kay nag-eskwela og siyudad.

Tuod, pagpangutana ni Renante niadtong tawo, giingnan siya nga mosubay niadtong karsada nga wala na kaagi-i og sakyanan ug mora’g nahimo na lang dalan-dalan.

Nalantawan ni Renante ang usa ka babaye, sa iyang tan-aw batan-on pa ug usa ka dalaga. Nagpas-an kini og container nga kun wala siya masayup puno sa tubig.

Gipaabot ni Renante ang babaye aron mangutana. “Miss good afternoon, nakahibalo ka ba kun asa ang balay ni Rico nga nag-eskwela gani sa siyudad?”

Mihunong ang babaye ug mipahiyom. “Layo-layo pa ra ba gikan dinhi pero duol ra na sa among balay,” matud sa babaye. “Pwede ba og magkuyog na lang ta miss?” ni Renante pa nga nalipay nga dili na siya masaag.

Nakita ni Renante nga bug-at ang gidala sa babaye. “Miss, bug-at man kanang imong dala.” Mipahiyom ang babaye apan klaro kaayo nga naghangos na sa iyang pagginhawa. “Unsaon kawsunon man gud ang tubig dinhi sa amo,” sa babaye pa.

“Ako diay si Renante,” paila niya sa babaye. “Gingging ‘sab ang akong ngalan,” dali tubag sa babaye.

“Uy Ging, kadiyot usa, ako la’y pas-an anang imong gidala nga usa ka container nga tubig bi, unya ika’y dala sa akong back bag,” matud ni Renante dungan sa paggunit sa container.

Misuway pagbalibad si Gingging apan giilog na ni Renante ang container. “Kaikog nako nimo uy,” matud ni Gingging. “Ayaw na kaikog, amiga na bitaw ta. Yuna may kalingawan man kuno karon ingon si Rico mao nga iya ko nga giimbitar?” matud n i Renante.

“Ugma pa ang dinhi sa Cabungaan uy... ang karong gabii adto sa Sitio Ilum ang kalingawan, duol sa imong gikanaugan ba sa Catmon-daan. Mangadto man ‘sab mi si Rico kay nagsabot man mi ganina,” ni Gingging pa.

Nagkaduol na sila niadtong nagpundok nga kabalayan. “Bai Renante! Ikaw na nga kauban ni Gingging bai!” milanog ang tingog ni Rico didto sa unahan.

“Dakua g’yud og tingog ni’ng Rico uy,” matud ni Gingging nga ingon sa gibati’g kauwaw nga gisangyaw nga nagkuyog sila si Renante.  (Sumpayan)