Tagpila man mo, Day? Ikaw? Ikaw? Ikaw? Ikaw?†matud sa tiguwang lalaki nga mora’g gikan nagduwa og tennis. Nagsul-ob og puti nga T-shirt ug short pants ang tiguwang. Gitagsatagsa og tudlo sila si Odit, Abet, Waning ug Estela nga nagtupad og lingkod sa gutter daplin sa karsada atubangan sa bag-ong natukod nga gasoline station.
Nakalitan sila sa pangutana sa tiguwang. Nagngisi lang ang tiguwang. Wa sila katingog dayon. Nanglingkod lang sila dinhi kay way laing kalingkuran. Way tindahan sa duol.
Gasoline station ra gyud. Domingo rong adlawa. Alas siyete pa sa buntag. Naghulat sila sa ilang school bus sa kolehiyo kay duna silay field trip.
Mga klasmet silang upat ug nagpuyo sa usa lang ka boarding house di layo sa gasoline station. Mga katarungan ra silang upat ug puro mestisahon og hitsura.
Tungod kay init ang panahon, wa kaayo sila mangarte. Mga casual lang ilang mga sapot nga gipangsul-ob.
“Kinsay kinabaratuhan ninyo? O ang kinamahalan ba hinoon?†dugang sa tiguwang nga daw dukerok ug naglaway nga nagsud-ong sa mga dalaga.
Si Odit ang pinakamaldita sa upat, ang unang nakaamgo sa gipasabot sa tiguwang.
Dali siyang nitindog ug giatubang ang tiguwang.
“Unsay pagtoo nimo? Mga puta mi?†ni Odit nga nanighawak. Malagoton ang sinultihan. Nauknol ang tiguwang. Nakapanglab-ok og laway.
“Ikaw? Pila man ka? Kay paliton tika’g dauban!†dugang ni Odit. Gitulisok ang tiguwang. Kasagpaon sa naulahi. Nisirit og lakaw ang tiguwang. “Tiguwang dautan!†gisinggitan ni Odit. Nisamot kalagsik ang lakaw sa tiguwang nga way lingilingi.
Dihang layo na ang tiguwang, gipatindog ni Odit ang iyang mga kauban.
Total, di na man madugay ang school bus. Magbarog na lang silang maghuwat. Kay, sa ilang porma nga nangyaka sa gutter nga naglaray daplin sa karsada, mora sila’g gidispli nga mga call girls.
“Mao diay’ng nakapangutana’g ngil-ad ang tiguwang†tuaw ni Odit sa hilom. (Katapusan)