Hilig moinom

Dear Tita Salie,

Maayong adlaw. Tagoa lang ko sa pangalan nga Slimshady, 29 na ang pangidaron karon, usa ka minyo ug dunay 3 kabuok mga anak.

Mangayo unta ko sa imong mga bulawanong hunahuna mahitungod sa akong kinabuhi karon. Hilig man god kaayo ko moinom og mga tambal nga pang sexual enhancement. Nagsugod ko niini sa pag-edad pa lang ako og 24. Nag-estoryahanay man god mi sa akong barkada bahin sa mga tambal para pagahi o para pagana sa sex. Nakuryoso pud ko mao nga akong gisuwayan ang maong mga tambal.

Giganahan ko sa epekto, Tita, kay dugay man gyod siyang mapalong busa nagsige na ang akong pag-inom niini. Kun mogamit ko sa akong asawa moinom gyod ko sa maong tambal hangtod karon.

Apan matud pa sa uban, kuyaw kuno kining akong gibuhat. Tingali kuno kun ma-dependent na ang akong  lawas  sa maong tambal. Ug kon dili nako moinom niini basin dili na usab mogahi ang akoa, kay naanad na man ang akong lawas nga duna koy imnon. Tinuod kaha ang ilang giingon, Tita? Unsay angay nakong buhaton? Palihog pasabta ko. Daghang salamat and more power.

* * *

Slimshady,

Ako usab moingon kanimo nga dili maayo ang imong gibuhat nga nagsige ka og inom nianang tambal. Tinuod gyod nga mahimong dependent ang condition sa imong lawas sa maong tambal. Apan magsugod kini diha sa imong hunahuna. Of course, kun dili ka makainom maghunahuna kana nga kulang ang imong condition kay wala ang tambal. Kun mosulti ang imong hunahuna nga kulang, mosunod usab ang imong lawas niini ug kulang usab alang kaniya.

Dapat nimong masayran kun unsa ka powerful ang atong hunahuna. Dili ka ganahan sa sex kun wala sa imong hunahuna ang kalami niini. Anaa sa hunahuna ang tanan kabahin nianang butanga. Busa kun maanad ka nga anaa ka na kulang na gyod kanunay ang imong buhaton kun sa panahon nga wala ka mogamit niini.

Wala ka pa usab manginahanglan niini tungod kay bata ka pa. Busa mas maayo pa siguro kun ang imong kuwarta nga ipalit sa maong tambal imo na lang tigumon alang sa kaugmaon sa imong mga anak.

Sa akong gisulti sa sinugdan nga powerful ang atong hunahuna, disiplinaha ang imong hunahuna ug tudloi siya nga kaya pa nimo ug mag-enjoy ka pa bisan wala ang maong tambal.

-- Tita Salie