Sobra sa 7 palabras

Kabalaka. Mao kini ang mipuno sa akong dughan. Hapit na man gud ang Biyernes Santos, ang adlaw nga i-on the air ang among pamalandong sa 7 Palabras. Apan diyotay pa lang ang nahibalik nga sobre sa solisitasiyon sa miaging bulan ko pa gipanghatag sa akong mga suking sponsors, kinsa sagad mga kauban ko sa trabaho. Gipahinumdoman na ra ba kong Noy Erning kun may nakolekta na ba ko para ipundo ngadto sa estasyonan sa radyo. Pastilan, unsa kahay angay’ng buhaton, no?

Krisis ron sa among trabahoan. Daghang benefits nga kanhi dawaton kada Pebrero sa mga empleyado nga ning bag-ong administrasyon wala na ihatag. Nakaprograma na ra ba ang maong cash benefits alang sa mga galastohan sa matag usa sama sa: pang-final tuition fee alang sa mga anak nga nagtungha sa pribadong eskuylahan; pangbayad sa utang para sa gipatahing gown o bag-ong sinina, karsones ug sapatos sa mograduwar nang mga liwat; pang-buhis sa mga real estate tax sa City Hall ug pang-lukat sa mga alahas nga rematihonon na.

Gumikan niini, napugos kog duol ni Onyot Negosyante, kinsa nagpatanto og kuwarta. Diyosnon ang maong tawo. Busa, nagtuo ko nga humok nig kasingkasing kun may mangayo’g tabang bahin sa mga relihiyosong kalihokan. Gitunolan ko siya’g sobre sa 7 Palabras uban sa pamasin nga may maamot siyang dakodako nga kantidad. Nalipay ko nga iya ning gidawat ug gisulod sa iyang waist bag. Mihulma dayon sa akong hunahuna nga sa tulo ka kantidad nga pilian didto sa solicitation letter, maoy pilion ni Onyot ang kinadak-an. May beach resort na man god ni siya. May mga apartment nga giparentahan ug may mga taksi pa gyong nagdagan.

Pagka ugma, pagsulod gyod nako sa trabahoan, nagkasugat  mi. Gipaninglan ko siya sa sobre.

“Aw, kuhaon na nimo, Doods?” Ni Onyot pa nga mitan-aw sa seryoso kong nawong. Dayon, gibitad niya ang siper sa iyang waist bag. Pagka abli, may gikuha siya -- ang puting sobre sa 7 Palabras.

“Oh, nia ra, Doods.” Niya pa nga mitunol sa sobre. Tapos ko kini dawata, mipalayo gilayon si Onyot.

Dihang ako na lang usa sa akong gitindogan, gikulbaan ko. “Pila kahay gisulod ni Onyot ini, no?” Nako pa nga mahinamong misugod pag-abli sa sobre. “Tingale, ang maximum amount gyod!” Natriling ko samtang mipadayon pagpagawas sa solicitation letter. Pinilo ang maong sulat og katulo. Sagad, adto ibutang sa tungatungang bahin sa papel ang kuwarta nga itampo sa mo-sponsor. Daw baraha nga gihinayhinay ko’g pinta ang pilay donasiyon nga gipasulip-it ni Onyot. Ug sa nabukhad ko na ang kinatibuk-ang papel, nahasiga akong mata.

Wa ko magtuo nga sa ka relihiyoso ni Onyot, mabuhat niya kadto. Huyhoy akong abaga nga mipadayon paglakaw sa direksiyon nga ingon sa wala nay tumong. Didto, nasayran ko unsang matanga sa kalipay ang gipalabi ni Onyot ning kalibotana: ang materyal ba, o ispiritwal? Ug di mahitabo nga masayop ko. Kay gimatuod man kini dinhi sa nakum-ot nang sobre sa 7 Palabras nga gihatag ko kaniya. (Kataposan)