Maria Magdalena - Gula 29

Ingon sa nawad-an ko og gana ni Elizar. Hangtod nga dihang gipul-an na ko sa pagpunay niya’g text, giilisan nako ang akong simpack aron dili na ko niya makontak. Nawad-an man gud ko’g gana ni Elizar bisan may nahitabo na kanamo sa makadaghan. Ang akong kalibotan mora’g mibalhin pagtuyok didto kang Marcos.

Ambongan man sab gud si Marcos. Kun kalitan siya pagtan-aw, susama gyud siya’g panagway ni Derek Ramsey, ang lalaki sa Secret Affair. Lalaki gyud kaayo ug maayo pang modula og basketball. Mao nga dihang nangulitawo siya kanako, wala gyud nako palabya ang higayon. Gisugot nako dayon si Marcos.

Sa panahon nga walay klase, ilabi na sa panahon nga adlaw’ng Sabado ug Domingo, kanunay kaming magkuyog sa pagpanuroy si Marcos. Manan-aw mi’g sine ilabi na kun nindot ang salida ug favorite pud namo ang bida nga mga artista. Sagad, adto kami manan-aw og sine sa E-mall kay duol ra man kaayo kini sa among school.

Usa ka higayon niana, maoy among gitan-aw ang pelikulang Skyfall nga gibituonan nila ni Daniel Craig ug gusto unta namong subli-sublion pagtan-aw apan kulang kami sa panahon. Gabii na sa dihang nanggawas kami sa sinehan.

Mipara si Marcos og taxi. Nanakay dayon mi. Abi ko’g ihatod na ko niya pauli sa akong boarding house. Pero didto man kami mosangko sa usa ka motel. -- Sumpayan pa