Gula 28
Sa akong pagpauli sa boarding house usa niana ka udto, misulod ko sa internitan ug dihang miabli ko sa akong email, may message si Elizar.
Nangayo siya’g pasaylo nga wala na siya makabalik sa Barili kay gipatabang siya og paninda sa ilang lola didto sa Dumaguete. Gibalitaan sab ko niya bahin sa iyang kahimtang didto.
Nalipay na lang pud ko kay daghan man og paagi aron dali rang makontak ang gusto natong kontakon karon. Puyde sa text, or cell or sa internet.
Giampingan gyud nako pag-ayo ang akong selfon nga 8210 bisan karaan na kaayo tungod kay nasayod ko nga dili na ako makapalit pa og lain kay dako na man ang gastohan nila ni mama sa akong pagtungha.
Tungod lagi sa gibati namong kamingaw sa usa’g-usa ni Elizar, may mga higayon nga mag-phone sex mi. Mura gyud mi’g mga boang. Pero nalipay baya sab ming duha sa among gibuhat bisan pinaagi lang sa cellphone ang among parayganay. Ganahan man sab gihapon mi.
Miabot ang panahon nga may mga bag-ong amiga ug amigo na ko sa among school. Ug dihang gikaila nako si Marcos, estudyante sa Mechanical Engineering sa among unibersidad. Inanay nga nakalimtan nako si Elizar.
Kanunay mo-text nako si Elizar pero dili ko mo-reply. -- Sumpayan pa