Maria Magdalena - Gula 22

Miabot ang adlaw sa among graduation. Malipayon kaming midawat sa among mga diploma. Apan luyo sa among kalipay, diha ang kabalaka. Nagkahulogan man gud kini nga magkalagyo na kami si Elizar.

“Magkalagyo gyud ta ani, Maria. Adto man gud ko pa-eskuylahon sa akong parents sa College sa Dumaguete, sa Siliman,” matud ni Elizar dihang nakahigayon mi sa pagsultihanay human sa graduation.

“Magkalagyo na diay ta,” matud ko, “kay ako, gusto man sab nila ni Papa ug Mama nga sa siyudad na ko eskuyla. Sa CIT seguro kay University na man na ug dili kaayo mahal compare sa uban.”

“Magteksanay lang ta kanunay,” ni Elizar pa. “Ug ayaw baya pangita’g laing lalaki, ha, Maria.”

Akong gipasaligan si Elizar nga siya ray akong higugmaon ug dili ko mangita’g laing lalaki nga akong ipuli sa iyang dapit sa akong kasingkasing. Nagkasabot kami nga magtawganay ug magteksanay ug mag-abli sa among facebook kanunay kun atoa na unya siya sa Dumaguete samtang ako sa siyudad.

Paglabay sa pila ka adlaw human sa among graduation, nanghipos na ako sa akong mga dad-onon. Molarga na ko paingon sa Cebu City aron magpa-enroll sa usa sa mga University sa Cebu City. Bisan tuod og duol lang ang siyudad apan excited kaayo ko kay unsaon panagsa ra man intawon ko makaabot og suroy sa maong dapit. -- Sumpayan pa