Ang Bakasyonista - Gula 4

Diha pa masayri ni Charles nga komedyante ‘sab diay si Rose. Wala na sila mataha sa usa’g-usa ug giangkon na sa ulitawo nga nakit-an niya ang dalaga nga nagtukas sa iyang sapot kaganinang kaadlawon.

Giluok pagkusi ni Rose si Charles apan nagkatawa ang dalaga. Nagkinataw-anay ang tulo didto sa kwarto. “Unya gaw, unsa may gibati nimo nga nakakita sa lawas ni Rose? Naglain ang imong kabuhi gaw?” pangutana nga dala ang komedya ni Sherlyn.

Mipahiyom lang si Charles nga misud-ong kang Rose apan ang iyang kaisipan naghanduraw na kun unsa kaha ang iyang pagabation kun maangkon na niya ang dalaga. Paspas kaayo ang pagtuyok sa orasan ug takulahaw lang nga miabot na ang kagabhion.

Naghigda-higda na sila sa masi’g nila ka higdaanan si Charles sa usa ka katre, ug sila si Sherlyn ug Rose sa pikas katre. Apan taud-taud, may mituktok sa pultahan sa kwarto. Ang inahan diay ni Charles ang nanuktok.

“Magpauban usa ko ni Sherlyn mamalit mi og makaon nato... mora’g midnight snack ba. Bilin lang ka Rose kay dali ra mi,” matud sa inahan ni Charles. “Bitaw Rose, diha lang mo si agaw Charles pagkalingaw lang usa mo’g sultihanay,” ni Sherlyn pa.

Nakita ni Charles nga naglukob sa habol si Rose. Nakahuna-huna ang ulitawo nga iyang komedyahan ang dalaga. “Kana, paglukob g’yud aron nga dili ka na magbukas sa imong sinena,” ni Charles pa nga nagngisi.

Mingisi ‘sab si Rose. “Buanga bitaw Charles, dili g’yud ko makabantay nga matukas g’yud nako ang akong sinena kun makatulog na ko kay initan man gud ko.”

Nadungog nila ang mga patak-patak sa sin ug nagpasabot nga mikalit lang pagbunok ang kusog nga uwan. “Hala, sila si Mama ug si agaw Sherlyn naabtan sa uwan,” matud ni Charles. Mibugnaw ang palibot.

Taud-taud nag-text si Sherlyn kang Rose ug Charles nga natanggong sila sa Colon sa kusog nga uwan. Giabot na’g duka si Rose ug hangtud nga giganoy gayud siya sa katulogon. Ingon usab niini si Charles, nakatulog na lang ‘sab ang ulitawo.

Paglabay sa mga tunga sa oras, nahigmata si Charles ug nasuta niya nga nagpadayon pa pagbunok ang uwan. Nabantayan niya nga nag-text diay si Sherlyn sa iyang selpon. “Lawom na ang tubig diri sa Colon gaw.”

Gilingi ni Charles si Rose nga didto sa pikas katre apan maoy misugat sa iyang panan-aw ang nahinanok na nga dalaga. Taud-taud, hinay kini nga milihok ug gipangwakli niini ang habol nga gilikit unta niya sa iyang kalawasan.

Diha pa masuta ni Charles nga nagsayal diay si Rose ug naapil kini nga natukas. – Sumpayan sa Domingo na