Mat-an pa sa pinya si Indoy rong mga taknaa kung kinsang mga tawhana ang matagakan sa ilang kwarta. Puniton dayon kini niya. Taas na man gud ang iyang listahan sa utang sa tindahan nilang Inse Kuwan. Ania karon siya sa dalan Colon diin ang kadaghan sa mga tawo makalibat tan-awon. Nagsugat-sugat sama sa hulmigas ug sum.
Tuod man nakapunit gyud siya’g piso, singko ug dyes nga sinsiyo sa kadalanan nga semento ug aspalto. Apan igo lang ni niyang gipamainit sikwate ug puto.
Buntag nang dako. Alas-otso na sa relo sa trapiko. Ang manindahay sa aseras nagpabuto na sa mga kanta sa Pasko. Misamot iyang kaagresibo nga pasigaon pang iyang mata pag-ayo nga kulang sa vitamin A. Ug gilakip na niya pagtutok ang mga bag ug bulsa sa mga tawo.
Wa madugay mipilit na iyang mata sa usa ka bagal nga pitaka nga diha sa luyong bulsa sa karsones maong nga gisul-ob sa usa ka tawo nga malipayon kaayo’g panagway nga misud sa usa ka Mall, namilipilig relo, sapatos, t.shirt ug uban pa. Samtang gitudloan usab siya sa iyang yawan-ong hunahuna “Ing-anaa pagkuot ang pitaka, ay...†ug kalit mi-brown out.
Naghinam-hinam na si Indoy sa pagbungkag sa pitaka nga nakuot niya sa maong tawo nga gituhoan niyang nakadawat na sa 13th month kay malipayon man kaayo kini ganina.
Gi-lock niya ang pultahan sa iyang kwarto ug gihulhog dali ang mga sud sa pitaka. Misiga iyang mata ug misinggit “No! Way sud bisag piso!â€
Ang nakabagal diay sa maong pitaka kay listahan sab sa utang dihang iyang gitandi sa listahan sa iyang mga utang mas taas pa kini’g times 2. Nakahinuklog karon siya kung nganong malipayon gihapon kadtong maong tawo nga maoy tag-iya sa pitaka nga iyang gikuot. (Kataposan)