Gustong makasal

Dear Tita Salie,

Maayong adlaw. Just call me Ms. Cancer, dili minyo apan dunay kapuyo, ug mao kini ang nakahatag nako og problema karon. Hinaot, Tita, nga imo kong tambagan og tabangan kun unsay angay nakong buhaton.

Nakig live-in ko sa usa ka lalaki nga minyo sa una apan karon bulag na sa iyang asawa. 12 na ka tuig ang milabay sukad sa ilang panagbulag. Ang iyang asawa duna nay laing pamilya ug may mga anak na usab. Nagpuyo mi, Tita, sulod na sa 6 ka tuig ug dunay 1 kabuok anak. Pero wala silay anak sa ilang kaminyoon.

Kining akong partner dunay mga insurance nga gikuha. Iyang beneficiaries ang iyang mga ginikanan, igsuon ug ang among anak. Maoy iyang gusto nga i-apil ko sa mga beneficiaries. Puyde ba ko nga maapil, Tita, bisan kun dili pa mi kasado?

Karon, Tita, maoy among gusto nga mahimong legal ang among pagpuyo. Total bulag na man siya sa iyang asawa ug duna nay asawa ang iyang pamilya, maoy among gusto nga magpakasal na lang mi aron gyod duna na mi katungod sa usa’g-usa. Puyde na ba ming magminyo bisan kun wala pa ma-annuled ang iyang unang kaminyoon? Unsa may akong buhaton? Palihog pasabta ko. Thank you very much and God bless. -- Ms. Cancer

* * *

Good day, Ms. Cancer. Mahitungod sa insurance sa imong bana, iya kanang katungod kun kinsay iyang gustong mga mamahimong beneficiaries. Busa kun dili mo kasal puyde ka niyang ibutang as beneficiary,  pero dili isip iyang asawa kay dili man gyod ikaw ang iyang asawa.

Ug bisan unsaon ninyong duha sa imong kalib-in karon dili gyod mahimo nga magminyo mo bisan pa man kun dugay na nga bulag siya sa iyang asawa, ug bisan kun duna nay laing pamilya ang asawa sa imong partner. Busa kun simbako mamatay ang imong partner ang iya lang gihapon nga asawa ang dunay katungod kaniya kay legal man siya nga asawa.

Busa kun ingon na niana ang ilang sitwasyon, ingna ang imong partner nga magpa-annul na lang sila sa ilang kaminyoon. Total duna nay pamilya ang iyang asawa busa magtinabangay na lang silang duha aron mas madali ang pagpa-process sa ilang annulment. Tungod kay annulment ra gyud ang solution aron madayon mo sa inyong plano nga magminyo. Dili gyod mo puyde kaslon kun dili pa sila annuled. O kaha maghulat ka nga mamatay na ang iyang asawa, kay puyde na kamong magpakasal, pero samtang buhi pa ang iyang asawa wala pa moy kagawasan nga magminyo, ug padayon lang mo sa pagpuyo-puyo. -- Tita Salie