Pahiyom ni Charisse

Gula 5

Gipaminaw ni Charisse ang lyrics sa awit Love Me With All of Your Heart. “Uy, mora man og ang matag pulong sa kanta Marc gikan sa lalaki nga nanguyab og babaye,” matud ni Charisse.

“Bitaw Char, gusto nako nga ipaagi lang usa sa kanta ang pagpanguyab nimo,” ni Marco pa nga nagpahiyom nga milingi sa dalaga. “Hala kalain, kadali gud nimo nga manguyab Marc.”

Duol na sila sa dapit nga adunay nagtukar. Mihunong sila dapit sa punoan sa kahoy. Gipasabot ni Marco si Charisse nga ang tinuod sa pagkakita pa lang niya sa dalaga kaganinang buntag, gibati dayon niya ang dili masabot nga pagbati.

“Tinuod bitaw Char, wala g’yud ko’y tuyo nga moanhi sa bukid. Dili tinuod nga gusto ko nga mosusi og venue sa training center sa Taptap. Ang akong tuyo pagpasakay kanimo sa akong sakyanan mao nga ako ka nga makaila ug masuod.”

Ingon si miiknat ang kilay ni Charisse nga nakadungog apan klaro nga wala kini masuko kay mibathay man gani ang pahiyom sa iyang mga ngabil ug misamot kalamorok ang iyang aping samtang nagpahiyom.

“Gwapaha g’yud nimo Char uy labi na og mopahiyom ka na. Usa g’yud kana sa rason nga nabihag nimo dayon ang akong pagbati,” wala na g’yud magpugong-pugong si Marco.

Wala makatingog si Charisse ug pagka taud-taud. “Tana uy, molahos na ta sa unahan kay nangabot na ang akong mga barkada para ‘sab nga ila ka nga maila-ila,” giingnan ni Charisse si Marco.

Mahinangpon nga giabi-abi si Marco sa mga barkada ni Charisse. Wala gayud mosipyat si Marco sa pagpaninguha niya sa dalaga kay mao kini ang labing gwapa sa magbarkada.

Nakabantay si Marco nga gisungog si Charisse sa iyang mga barkada kay nagduda nga aduna sila’y relasyon. Natagbaw og pamalibad si Charisse.

“Swerte g’yud kaayo ka Marc kun si Charisse ang mahimo nimo nga girlfriend kay buotan kaayo kining among amiga,” matud ni Liza ngadto ni Marco.

Mipahiyom si Marco ug gisakyan ang gisulti ni Liza. “Maayo unta og inyo ko nga tabangan.” Gitutokan ni Marco si Charisse nga nagpahiyom.

Takulahaw lang nga miapas ang inahan ni Charisse. Miduol kini kang Charisse apan nananghid lang ‘sab dayon nga mopauli kay duna ra siya’y tuyo sa  unahan.

“Mopauli na lang ko sir. Kamo na lang si Charisse ang pagkuyog pauli inighuman sa kalingawan,” matud sa inahan sa dalaga. Nagtinutokay ang magbarkada. “Hala, nausab na lagi ang imong mother Char. Kaniadto dili g’yud mopauli kun dili ka niya kauban.”

“Natan-aw man gud tingali niya nga luwas si Charisse kun kami ang magkuyog,” sagol-komedya ni Marco. (Sumpayan)