Goodbye is not Forever

Gula 97

Bisan og nagpaninggit sa pagsuki ang kahiladman ni Vanessa apan walay laing mahimo kun dili ang pilit nga pagtahan sa kaugalingon aron ihawon.

Ingon ana ang pagtan-aw ni Vanessa sa iyang kahimtang karon. Sumala pa sa resulta sa eksaminasyon nga gipahigayon kang Doktora Urielle Del Valle kaniya, anaa na sa acute stage ang iyang sakit. Ang doktora nga naghiling kaniya miingon nga taas-taas na ang usa ka tuig nga abton sa iyang kinabuhi. Nga sa dili madugay mamatay na gyud si Vanessa.

Ang mapinanggaong amahan, si Mr. Santos mihatag og bulawanong mga pagmaymay ngadto kang Vanessa. Ang iyang amahanong advice walay paghupas.

“Kinahanglang batonan mo ang kalinaw sa hunahuna sa pag-atubang niining imong kahimtang, anak,” nagkanayon ang iyang Papa Victor sa hinay ug malumo nga tingog. “Dili kay ikaw ray naingon niini. Ug ayaw pagpakawala sa paglaom. Wala’y makalabaw sa gahom sa Dios.

Nagpabilin nga wala magtingog si Vanessa. Bisan dunay mga higayon sa pagpamulong ni Mr. Santos nga gituyo pagputol aron iyang sumpayan, nagpabilin gayod siyang nagpakahilom. Lawom ang iyang gihunahuna.

Wala na sila’y mahimo aron pugngan ang unsa man nga posibleng mahitabo kaniya sa umaabot. Busa karon pa lang, gidawat na niya ang kapakyasan sa iyang kapalaran. -- Sumpayan pa