Kliyente nga kanhi uyab

Uneasy si Atty. Hector Luwag karong buntaga. Kay bisita niya sa iyang bupete iyang kanhi hinigugma nga si Delia. Dalaga pa si Delia apan napaangkan. May pamanhonon siya nga for-eigner. Gusto ang foreigner nga mabalhin sa apelyido niya ang apelyido sa bata, human sa ilang kasal. Mao ni karon ang gipangunsulta ni Delia sa abogado nga may kagahapon sa dalaga. Naglingkod ang kliyente atubangan sa lamesa sa abogado.

Nikawat og pasiklap si Hector sa iyang wala. Usa ka dupa sa iyang wala naa ang lamesa sa iyang kapikas nga si Mira nga mao ra say iyang sekretarya. Usa ka dupa sa iyang luyo may bakanteng lamesa aron anha diha mamirma og papeles ang mga kliyente. Sa duha ka lingkuranan dikit sa maong lamesa, nagtagsa og lingkod si Lira ug iyang bana. Si Lira bayaw ni Hector kay manghod ni Mira. Tupad ni Lira sa iyang wala, si Daniel iyang bana nga usa ka Amerikano. Tayming nga nibakasyon sila sa Pilipinas ug nibisita sab ni Hector.

Sobra ang pag-amping ni Hector nga di mahalata iyang lihok. Si Delia rang usa ang nangunsulta. Sunod bulan pa moabot ang foreigner. Pormal kaayo ang lihok ni Hector. Way kasayuran si Mira mahitungod ining iyang ex-girlfriend. Kay usa ra ang gitug-an ni Hector sa kapikas. Pagkatinood, tulo pa ka uyab ang niagi ni Hector una niya pakasli si Mira. Napugos og pakasal si Hector dihang nabisto siya ni Mira nga may laing uyab. Apan tulo gyud iyang gilumpong. Ikaupat si Mira nga maoy the best and prettiest of all. Maong wa na niya buhii.

“Sayon ra na, Del, aw Miss Tungog. Inig human ninyo’g kasal, petisyonan na lang sa imong bana imong anak. Himoan og legal adoption,” ni Hector. “Mao ba, Tor, aw attorney?” ni Delia. Nipasiklap ni Mira nga nanghapnig sa mga papeles ibabaw sa iyang lamesa. “Tawga lang unya ko kun maghikay na mos papeles sa inyong kasal, ug sa adoption sa bata,” ni Hector nga nitunol og tarheta ngadtong Delia. Gidawat ang tarheta ni Delia nga mapahiyomon. Nitindog ug nitalikod.

“Wa man lagi nimo paningli og consultation fee?” ni Mira dihang tua nas gawas ang kliyente. “Ah tingbon na lang. Kaila na man mi daan niya. Librarian man to siya sa law school,” ni Hector. Nikanga. May nibuthong mga lusok sa singot sa iyang agtang. Bisag bugnaw ang aircon. Bisag dugay na silang minyo, selosa gihapon iyang kapikas. (Kataposan) (Sa gusto’g libreng kunsulta, dad-a ning pahina sa sugilanon sa opisina sa tagsulat, sa Sabado’s buntag)