Posible nga mosumbong gyud si James ngadto kang Josheba kun makapaniid kini sa iyang kalihokan sa pagpakigsuod kang Vanessa. Mahigpit niyang karibal si James sa gugma ni Josheba. Ug kun panimaslan siya niini sa pagtraydor nga paagi, wala gyud siya’y dag-anan. Wala siya’y kalibotan kun mohinok kini pagpadala og message sa internet pinaagi sa email.
Unya kalit lang kaayong mikuba ang dughan ni Albert dihang may lain nga misantop sa iyang hunahuna. Ang mga nurse nga classmate nila sa una ug mga higala ni Josheba posible usab nga motaho ngadto ni Josheba mahitungod kanila ni Vanessa. Ug kun simbako may usa kanila nga motaho ngadto kang Josheba mahitungod niini, mabuko gyud unya siya ug masayran sa iyang hinigugma ang iyang binuhatan.
Wala pa gani mahitabo ang iyang gikahadlokan, gisanasana nang daan ni Albert ang iya unyang itubag ug pangatarongan ngadto kang Josheba kalabot sa iyang binuhatan.
Unsaon kaha niya pagpasabot si Josheba kun masayod na kini sa iyang kalihokan ug mangabubho kini kang Vanessa? Nahadlok si Albert nga mahitabo kini. Gihigugma niya si Josheba. Wala’y makabanos sa espesyal nga dapit dinhi sa iyang kasingkasing.
Nagkalandrakas ang daghang mga butang sa hunahuna ni Albert nga nakapasalimuang sa iyang galamhan. -- Sumpayan pa