Goodbye is not Forever Gula 88

“Basin og makasamok lang unya ang akong pagtawag kanimo,” nagkanayon si Josheba ngadto kang Albert. “Gawas pa, mahal ang bayad sa matag panawag ko ilabi na kun gikan sa gawas sa nasud. Apan puwede na man kitang mag-Skype di ba? Mahimo ra tang mag-estorya ug magkit-anay pa diha sa internet kay high tech na man ta karon.” Dugang ni Josheba.

Si Albert nagpabilin sa iyang kahilom. Wala siya’y nahunahunaan nga isulti ngadto sa dalaga niadtong higayona.

“Al, gimingaw na kaayo ko nimo,” wala na gyud makapugong si Josheba sa pagpadayag sa iyang gibati.

“Mao sab ko, Sheb,” tubag ni Albert. “Apan mag-antos lang ta. Unsaon nga nahitabo na man kini.”

“Usa kini ka pagsulay sa atong gugma, Al,” matud ni Josheba. “Kun makalahutay kita, dan angay gyud kita sa usa’g-usa.”

Nahauknol si Albert sa gisulti ni Josheba. Wala siya makatubag. Kalit nga milakdop sa iyang hunahuna si Vanessa. Mikusog ang butok-butok sa iyang dughan. Grabe nga kakulba nga iyang gibati.

“Nadungog mo ba ang akong gisulti, Al?” sukna ni Josheba.

Naiking si Albert. “H-ha? A-aw, oo...”

“Pagtinarong lang diha, Al,” ni Josheba pa. “Pagbinuotan. -- Sumpayan pa